«Samruk-Kazyna Trust» qory 2016 jyldan beri ardagerlerge qoldaý kórsetip keledi. Bólingen qarajatqa Qazaqstan boıynsha qarııalarǵa eriktiler kómegimen azyq-túlik, medısınalyq dáriler, úıge qajetti shaǵyn jıhaz jetkizilip turady. Sonymen qatar joba aıasynda qarttarymyzǵa Qazaqstan Respýblıkasy men TMD elderi boıynsha temirjol kóligimen tegin jol júrý múmkindigi bar», dedi «Samruk-Kazyna Trust» áleýmettik jobalardy damytý qorynyń bas dırektory Alfııa Adıeva.
Atalmysh joba aıasynda 35 eldi mekende turatyn ekinshi dúnıejúzilik soǵys qatysýshylary men tyl eńbekkerleri qatarynda bolǵan 1 400 qarııaǵa turaqty túrde baryp otyrý, úıleri men aýlalaryn jınaýǵa kómek, jóndeý jumystaryna qolǵabys jasaý, azyq-túlik, dári-dármek, turmystyq zattar satyp alý qarastyrylǵan. Erekshe qajettilikteri bar ardagerlerge óz aldyna aıryqsha nazar aýdarylyp, qamkóńil qarttar qajetti turmystyq tehnıkamen, múgedektik arbalarymen jáne estý apparattarymen qamtamasyz etiledi.
«О́mirde jaqsylyq pen jamandyq qatar júredi, biraq siz oǵan oń kózqaraspen qarasańyz, ózińizge jaqsylyq tartyp turasyz. Qazirgi jas býynnyń osyndaı qulshynysy zor, ıgilikti isterge jany qushtarlyǵy qýantady. Bizge qamqorlyq tanytyp, jaǵdaıymyzǵa alańdap jatady. О́mirimizdi jaqsartyp, qaraılasýǵa tyrysqan uıymdastyrýshylar men eriktilerge alǵys aıtamyn, bul úlken qadam!», dep bólisti tyl eńbekkeri Marııa Karpenko.
Jobany 2016 jyldan beri «Samruk-Kazyna Trust» qory qarjylandyryp keledi. 2022-2023 jylǵy «Jeńis» jobasynyń bıýdjeti 115 mıllıon teńgeden astam somany quraıdy.
Bul jobanyń eń qundy tusy sol, jastar soǵystyń surapyl jyldarynan ótken jáne ekinshi jahan soǵysynyń jeńisinen keıin eldi qalpyna keltirýge bar kúshin salǵan aǵa býynmen jaqyn aralasyp, taǵylymdy áńgimelerin tyńdaı alady. Olar erlik pen otansúıgishtiktiń, ómirge degen zor qulshynys pen erik-jigerdiń bıik ónegesin kórsetip otyr.
