Sýretshiniń birqatar týyndylary áleýmettik jeliler men uıaly telefonǵa táýeldi bolyp qalǵan balalarǵa arnalǵan. Mysaly, bir sýrette anasynyń qursaǵynda jatqan balanyń gadjetke úńilgen qalpy beınelenipti. Endi bir sýrette jas ana sábıdiń ornyna «Facebook» belgisin qushaqtap tursa, ekinshisinde smartfonnyń qushaǵyndaǵy bala «TikTok» jelisinen sút emip jatyr.
Sýretshiniń búgingi qoǵamnyń ózekti máselelerine arnalǵan týyndylarynyń mazmunyn «Anaǵa hat», «Bul kún qashan bitedi?», «Basqa jerde oına», «Urmashy, áke, qorqamyn», «Qýyrshaq», «Mahabbat pa?», «Shaqyrylǵan abonentpen sóılesý múmkin emes», «Bala armany», «Álippe», «Meniń anam» degen sııaqty yqsham sóz tirkesteri asha túsedi.
Mysaly, keshkilik jumystan kelisimen balasyna bir aýyq kóńil aýdarýdyń ornyna, teledıdarǵa telmirip jatyp alatyn ákeler bar. Qylqalam sheberiniń qolynan shyqqan áleýmettik týyndylardyń birinde jamaýly oıynshyǵyn qushaqtap alyp, «Qudaı, nege meni teledıdar qylyp jaratpadyń? Ákem jumystan kelgende maǵan qarar edi!» dep jazyp otyrǵan kishkentaı qyz bala beınelengen. Sýretshi kóz aldyndaǵy ákesinen biraýyz jyly sóz estı almaı, jalǵyzdyq taqsiretin tartqan sábı qııalyndaǵy jazý arqyly bútindeı qoǵamǵa dabyl qaqqandaı kórinedi.
– Ańsaǵan Mustafanyń týyndylarymen buǵan deıin de áleýmettik jeli arqyly tanyspyn. Sýretshiniń shyǵarmalary shynaıylyǵymen erekshe, kóbine biz baıqaı bermeıtin, biraq aınalamyzda bolyp jatqan ózekti máselelerdi qozǵaıdy. Bul sýretter árkimge de oı salyp, bálkim kóp mańyzdy dúnıege onsha kóńil bóle bermeıtin talaı jandardyń óz otbasyna, áke-sheshesine, bala-shaǵasyna degen kózqarasyn ózgertýge yqpal etýi múmkin. Sondyqtan mundaı týyndylar kórmede emes, kóshelerde turýy kerek, – deıdi sýret galereıasyna kelgen qala turǵyny Muratbaı Jumash.
«Sóıle, sýret!» kórmesi bir aı boıy jumys isteıdi.
Qostanaı oblysy
