Fýtbol. Álem chempıonaty. Germanııa Brazılııany talqandap shyqty

ASTANA. 9 shilde. Búgin tún ortasy aýa Belý-Orızontı qalasynda Brazılııa jáne Germanııa quramalary birinshi jartylaı fınaldyq oıyn ótkizip, nemister 7:1 esebimen jeńiske jetti. Bul týraly egemen.kz habarlady. «Nemis máshınesi» oıynnyń 26-mınýtyna deıin esepti 5:0-ge jetkizdi. Ol bes goldy da eshbir qıyndyqsyz jáne qarsylastar tarapynan esh kedergisiz ońaı soqty. «Selesao» qorǵanys shebi birjola qaqyrap ketkendeı áser qaldyrdy. Brazılııa – Germanııa 1:7 (0:5). 9 shilde. Belý-Orızontı. «Mıneıran» stadıony. Tóreshi – Marko Rodrıges (Meksıka). Brazılııa: Jýlıo Sezar, Marselo, Davıd Lýıs, Dante, Maıkon, Lýıs Gýstavo, Fernandıno (Paýlıno, 46), Oskar, Bernard, Fred (Vıllıan, 70), Halk (Ramıres, 46). Germanııa: Manýel Noıer, Benedıkt Hıovedes, Mats Hýmmels (Per Mertezaker, 46) Jerom Boateng, Fılıpp Lam, Bastıan Shvaınshtaıger, Samı Hedıra (Iýlıan Draksler, 73), Mesýt Ozıl, Tonı Kroos, Tomas Mıýller,  Mıroslav Kloze (Andre Shıýrrle, 56). Goldar: Tomas Mıýller (11), Mıroslav Kloze (22), Tonı Kross (23, 25), Samı Hedıra (26), Andre Shıýrrle (69, 78), Oskar (90+1). Eskertý: Dante (67). Buǵan deıin bul komandalar álem chempıonatynda bir-aq ret kezdesken eken. Ol 2002 jyly Japonııa men Koreıa birigip ótkizgen birinshilik kezinde oryn alyp, brazılııalyqtar 2:0 esebimen utqan eken. Al myna match báriniń tý-talaqaıyn shyǵardy. Kezdesý brazılııalyqtardyń shabýylymen bastaldy. Olar osy aralyqta qaqpaǵa úsh ret uryp úlgerdi. Biraq 8-mınýtqa qaraı «býndestım» oıyndy teńestire bildi. Osydan bastap germanııalyqtar qarsy jaqqa sholǵynǵa shyǵýǵa kóshti. Olardyń alǵashqy soqqylarynyń ózi qaýip tóndirdi. Kenet... 11-mınýtta nemister kútpegen jerden gol salyp ketti. Ony komandanyń bas mergeni Tomas Mıýller túsirdi. Kelesi goldy 22-mınýtta Mıroslav Kloze salyp, barlyq chempıonattardaǵy golary sanyn 16-ǵa jetkizdi. Bul – jańa rekord! Al osy rekordtyń sońyn ala, 23 jáne 25-mınýttarda Tonı Kross qaqpa aldynda ózine eshkimniń tosqaýyl qoıa almaǵanyn paıdalanyp, eki birdeı dopty jibek tordyń aýmaǵynan bir-aq shyǵardy. Arada bir mınýt qana ótkende, Samı Hedıra tap osyndaı jaǵdaıda besinshi goldy da salyp úlgerdi. Ekinshi taımda osy oıyn sol kúıi qaıtalandy. Munda taǵy Brazılııa shabýylmen bastady. Biraq uzaqqa barmady. Sálden keıin qaıtadan nemister tizgindi ustady. Munyń aqyrynda alańǵa 56-mınýtta shyqqan Andre Shıýrrle eki ret qarsylastar qaqpasyn nysanaǵa dál aldy. Ol 69 jáne 78-mınýttarda esepti ósirip, 7:0-ge jetkizdi. Al eń sońynan, 91-mınýtta brazılııalyq Oskar bir doptyń qarymtasyn qaıtardy. Osylaısha kúni keshe Almatyda «Qaırat» pen «Aqtóbe» arasyndaǵy esep qaıtalandy. Onda da jeńimpaz komanda bar golyn salyp bolǵasyn, utylýshy jaq bir goldyń ornyn toltyryp edi. Sonymen, Germanııa - fınalda. Damır Qojamqul. Derekkóz: egemen.kz. Foto: Sportbox.ru.