Elimizdiń túkpir-túkpirinen jınalǵan jalyndy jastar aýdan ortalyǵy Saryózek aýylyndaǵy №12740 áskerı bóliminde daıarlyqtan ótip jatyr. Mundaǵy áskerı mamandar tártip qansha qatal bolǵanymen, merzimdi áskerge alynǵan jaýyngerlerdiń bir kúndik ómirimen tanysýǵa múmkindik berdi. Áleýmettik jelidegi alypqashpa qaýesetter qorǵanys salasynyń bedelin túsirgeni jasyryn emes. Sondyqtan sol salaǵa jaýapty mamandar buqaralyq aqparat quraldarynyń ókilderin arnaıy shaqyryp, sarbazdardyń jaıyn elden estigenshe, kózben kórýimizdi suraǵan edi. Bizdi kútip alǵan Saryózek garnızony baspasóz qyzmetiniń basshysy, maıor Abzal Sartaev elimizdiń ár óńirinen kelgen jaýyngerlermen ashyq áńgime júrgizýge múmkindik berdi.
Túrkistan oblysynyń Saıram aýdanyndaǵy Qasymbek datqa aýylynyń týmasy Sultanbek Tilestiń áskerge alynǵanyna 6 aı bolypty. Osy ýaqyt ishinde jaqyn dos, tálimger ustaz tapqan jas jigit dúnıege degen kózqarasy ózgergenin aıtady.
«Áskerge deıin oıym basqa-tuǵyn. Munda kelgennen keıin ásker týraly oıym túbegeıli ózgerdi. Qorqatyn túgi joq. Kerisinshe, adam ómiriniń aıtýly bir kezeńi deýge bolady. Qazir jastardy keı rette kúshtep ákelip jatyr. Shynynda, eshqandaı qınalmaı-aq kele berýge bolady. Álimjettik jasaý, uryp-soǵý degen munda joq. 6 aıdyń ishinde ondaı nárseni óz basym kórmedim. Bylaısha aıtqanda, ózine qol jumsaıtyndaı zorlyq bolǵan joq», degen jas sarbaz Sultanbek Baqytbekuly zamandastaryn áskerge kelýge shaqyrdy.
Tańǵy 6.30-da uıqydan turatyn sarbazdar aldymen jattyǵý jasap, belgili bir qashyqtyqqa júgirip keledi. Sosyn tósegin qyr shyǵaryp, muqııat jınaǵan jaýyngerler jýynyp, tazalanǵannan soń sapqa turyp, ashanaǵa kezekpen kiredi. Árbir mınýtty tıimdi paıdalanýǵa úıretetin áskerı tártip, tańǵy astan soń sarbazdardy plasta sappen júrýge baýlıdy. Sosyn aptasyna 2 ret – dúısenbi, juma kúnderi arnaıy quqyqtyq daıyndyq sabaǵy ótedi. Onda elimizdi qorǵaý jolynda erlik kórsetken batyr babalardyń ómir joly, áskerı sheshimderi men urys júrgizý tásilderi tanystyrylyp, qazirgi álemde oryn alyp jatqan oqıǵalardyń sebep-saldary, zalal-zardaby, basqynshylyq pen Otan qorǵaýdyń aıyrmashylyǵy syndy taqyryptar talqylanady. Budan keıin túski as. Tamaqtan keıin telebaǵdarlamalardy tamashalaýǵa nemese gazet-jýrnal, kitap oqýǵa ýaqyt beriledi. Odan soń árbir rota ózine tıesili baǵyt boıynsha daıyndyqty pysyqtaıdy.
Máselen, túrkistandyq Sultanbek Baqytbekuly «D-30» markaly zeńbirektiń nysana kózdeýshisi retinde teorııalyq bilimin jetildiredi. Osylaısha, 2-3 saǵatty áskerı tehnıkanyń tilin meńgerýge jumsaǵan sarbazdar etigi men syrt kıimin tazalap, keshki asqa barady. Munan keıin kıimniń jaǵasyna salynatyn aq matany aýystyryp tigý úshin ınege jip sabaqtaıtyn jaýyngerler saǵat 20.30-da teledıdardyń aldyna jınalady. Elimizdegi jańalyqtarmen tanysqan soń ózara pikir almasyp, kórkem fılm tamashalaıdy. Túngi tekseristen soń 22.30-da kazarmada kezekshilerden basqa sarbazdar jappaı uıqyǵa ketedi. Osylaısha, bir kúndi túıindegen jaýynger temirdeı tártipke úırenip, áskerı ómirdiń shıratar, shynyqtyrar ádetin meńgeredi. Baýyrjan Momyshulynyń «Tártipke baǵynǵan qul bolmaıdy» degen sózi osyny meńzese kerek.
Taǵy aıta ketetini, jaýyngerler senbi, jeksenbi kúnderi ata-analary, baýyrlarymen telefon arqyly sóılesip, beınebaılanyspen júzdesedi. Sultanbektiń sózin qatarlastary Nursultan Amanjol, Álisher Sekrenov, Rahman Elemes te rastap, óz basynan ótkergen oqıǵalaryn áńgimelep berdi.
«Saryózektiń syzdy aýa raıy soltústiktiń aıazynan da qatty bolatynyn sezingende tańǵaldym. Men ózim Aqmola oblysynyń Astrahan aýdanyna qarasty Jańaturmys aýylynan keldim. Alǵashynda temperatýra tómen bolǵanyna qaramastan, súıekten ótetin yzǵar soǵatynyn uqtym. №1 shabýyldaýshy batalonda qyzmet etetindikten kóbine polıgonda júremiz, dúısenbiden jumaǵa deıin palatkada jatamyz. Sonda baıqaǵanym, Jetisýdyń dymqyl aýasy soltústiktiń qurǵaq aıazynan sýyq bolady eken. Iаǵnı Kúreńbeldiń 20 gradýs aıazy soltústiktiń 30 gradýsyndaı seziledi», degen N.Amanjol óziniń áskerge qalaı kelgenin maıyn tamyza áńgimeledi.
«О́z basym áskerge keshigip keldim. 2000-shy jylǵymyn. Qazir 2004-shi jylǵylarmen boryshymdy ótep jatyrmyn. Oǵan Astanadaǵy Eýrazııa ýnıversıtetin geodezıst mamandyǵy boıynsha bitirýim sebep boldy. Dıplom alǵan soń jaýapkershiligi shekteýli seriktestik ashyp, 1 jyl jumys istedim. Bir kúni úıge kele jatyp, jolaı dúkenge kirgenmin. Azyq-túlik dúkeninde eki kisi tur eken. Solar JSN-ymdy surady. Oıymda eshteńe joq, onyń ústine sonyń aldynda JSN-ny aıtqan adamǵa tegin temeki taratqan bolatyn. Sol esime túsip aıta saldym. Álgi eki kisiniń bireýi planshetin ashyp, meniń derekterimdi qarady da: «Biz áskerı komıssarıattanbyz. Eshqandaı esepte joq ekensiz. Bizben birge júresiz!» dep áskerge alyp kete bardy. Sóıtip, dám tartyp Jetisýdyń tórinen bir-aq shyqtyq. Sodan beri, mine, 1 jyl zý ete qaldy. 40 kúnnen keıin úıge qaıtamyn buıyrsa. Áskerı ant qabyldaǵannan keıin 100 kún ótken soń ketetin kezimdi sanaı bastadym. Áskerge kelgenimdi alǵash myltyq atqanda uǵyndym. Oq-dáriniń ıisi burq ete qalǵanda alǵan áserim erekshe boldy. Sol kúnderdi qazir kúlip eske alamyz», deıdi N.Amanjol.
Jas sarbazdardyń áńgimesi óte áserli. Áskerge deıingi kúnderine kúlip qaraıdy. Kózderinde narkesken namystyń alaýy, sózderinde Otanǵa degen rııasyz mahabbat menmundalap tur. Biz jaýyngerlerdiń oqý-jattyǵý jıyndaryn kózben kórip, bir marqaıyp qaıttyq.
Jetisý oblysy
