«Qazgıdromet» fılıalynyń ókilderi 14 sáýirde óńirdiń ońtústik aýdandarynda kún raıy – 10 gradýsqa deıin sýytady, qar aralas burqasyn turyp, avtokólik joldaryn kóktaıǵaq jabýy múmkin dep eskertken. 15-ine qaraǵan túni Arqalyq tóńireginde, Jitiqara, Qamysty, Amangeldi, Jangeldın aýdandarynda boran kúsheıdi.
Tabıǵattyń tosyn minezi, ásirese, Amangeldi aýdanyndaǵy sharýabasty aǵaıyndy ábigerge salyp ketti. Máselen, bul óńirdegi tótenshe jaǵdaı qyzmetkerleri 17 sáýirde qar qursaýynda qalǵan 8 adamdy qutqaryp qalǵan.
«Amangeldi aýdanyna qarasty Qarasý aýylynyń turǵyndary Maqat aýylynan birneshe shaqyrym jerde ornalasqan jumysshylar qosynyna azyq-túlik apara jatyp qarly boranda qalyp qoıǵan. Jolda qalǵandarǵa kómektesý úshin shyqqan júk tıegish tehnıka da qalyń qardan óte almaı, ombylap batyp qalady. Bul habar aýdan ortalyǵyndaǵy órt sóndirý bólimine tańǵy saǵat 6-dan óte tústi. Qutqarýshylar habar alysymen dereý jolǵa attanyp, Maqat aýylynan 8 shaqyrym jerde qar qursaýynan shyǵa almaı turǵan «Nıva» avtokóligin qaýipsiz jerge súırep shyǵardy. Saǵat 09:45-te avtokóliktegi alty adamnyń bári aman-esen Mahat aýylyna jetkizildi», dep málimdedi oblystyq tótenshe jaǵdaı departamentiniń baspasóz qyzmeti.
Amangeldilik qutqarýshylar budan bir kún buryn qarly boranda adasyp ketken 2 shopandy izdep taýyp, malshylar qystaýyna jetkizgen. Shopandar dáriger kómeginen bas tartypty.
– «Sáýir bolmaı, táýir bolmas» deıtin qazaq emespiz be. Maldy qyrǵa shyǵaryp, arqany keńge salyp júrgende tabıǵat tosyn minez tanytyp, ábigerge salǵanyn qarashy. Arqanyń besqonaǵy boranymen kelip ábden sastyrdy. Yqqan maldy qaıyramyz dep atqa qonǵan eki azamat boranda adasyp ketkenin estip, Amangeldi aýdanynyń tótenshe jaǵdaı bóliminen kómek suraýǵa týra keldi. О́z isteriniń naǵyz mamandary dereý iske kirisip, aıdalada qalǵan azamattardy taýyp, aman-esen úılerine jetkizdi. Adam ómirine qaýip tónip turǵan syndarly sátte shuǵyl sheshim qabyldap, shopandardyń aman-saý oralýyna kómektesken qutqarýshylar men Úrpek aýyldyq ýchaskelik ınspektoryna alǵys aıtamyz, – deıdi aýyl turǵyny Serik Tólekbaev.
Qostanaı oblysy
