HQO-nyń aınalasyndaǵy alaıaqtar kúni búginge deıin astyrtyn áreket etip, júrgizýshi kýáligin satyp kelgen. Jaqynda polısııa qyzmetkerleri Qostanaı qalasyndaǵy mamandandyrylǵan halyqqa qyzmet kórsetý ortalyǵyna tintý júrgizip, júrgizýshi kýáligin saýdaǵa salyp kelgen qylmystyq topty ustady.
– Jedel tintý sharalary barysynda qylmystyq áreketke qatysy bar degen kúdikpen HQO-da emtıhan qabyldaýmen aınalysqan 5 adam ustaldy. Olar júrgizýshi kýáligin berý úshin aqy alyp kelgen. Emtıhanǵa kelýshiler berilgen 40 mınýttyń ornyna nebári 5 mınýttyń ishinde test tapsyryp shyqqan. Qazaq tilin bilmeıtin adamdar emtıhandy memlekettik tilde tapsyryp otyrǵan. Qazir qajetti bastapqy tergeý áreketteri, sondaı-aq aıǵaqtardy anyqtaý maqsatyndaǵy sanksııalanǵan tintý sharalary júrip jatyr. Bank kartalary, 1 mln teńgeden astam qolma-qol aqsha, kompıýterlik tehnıka, flesh-kartalar, uıaly telefondar men qujattar tárkilendi. Tintý kezinde kúdiktilerdiń birinen 12 kalıbrlik oq-dári jáne zańdy tirkeýde joq tegis uńǵyly myltyq tárkilendi, – dedi oblystyq PD basshysy Erlan Omarbekov.
Ustalǵandar – júrgizýshi kýáligi men júrgizýshi sanattaryna emtıhan qabyldaý qyzmetin tender boıynsha utyp alǵan jaýapkershiligi shekteýli seriktestiktiń ókilderi. Qylmystyq top úmitkerlerden aqy alyp, teorııalyq bilim men tájirıbelik daǵdyǵa emtıhan qabyldamaı-aq júrgizýshi kýáligin úlestirip otyrǵan. Polısııanyń málimdeýinshe, alaıaqtardy anyqtaýǵa oblys joldaryndaǵy kólik apatynyń shekten tys jıilep ketkeni túrtki bolǵan. Jol apatyna urynǵan júrgizýshilerdiń kóbi qarapaıym jol erejesinen beıhabar bolyp shyǵa bergen soń, polısııanyń júrgizýshi kýáligin beretin mekemege degen kúdigi de kúsheıe túsken.
– Mysaly, jyl basynda Rýdnyı qalasynda «Shevrolet Sobalt» kóligin mingen 19 jastaǵy júrgizýshi kýáligin alǵanyna bir aı tolmaı jatyp «Audi» avtokóligin soqty. «Audi» kóliginde otyrǵan jolaýshy aýyr jaraqat alyp, aýrýhanaǵa tústi. Mundaı zardaby aýyr jol apattary tym kóbeıip bara jatqan soń, salalas mekemelerdiń birinde astyrtyn sybaılasqan top bolýy múmkin degen kúdikpen mamandandyrylǵan HQO-ǵa qatysty arnaıy jedel shara júrgizý týraly sheshim qabyldadyq. Arnaıy operasııa oblys prokýratýrasynyń úılestirýimen ótti, – deıdi polısııa departamentiniń basshysy E.Omarbekov.
Qazir atalǵan qylmysqa qatysty tergeý amaldary júrip jatyr. Osyǵan baılanysty mamandandyrylǵan halyqqa qyzmet kórsetý ortalyǵy júrgizýshi kýáligi men júrgizýshi sanatyn alýshylardan teorııalyq jáne tájirıbelik emtıhan qabyldaýyn toqtatty. Polısııa kúdiktilerdiń júrgizýshi kýáligi men sanattar alǵan 1 myńnan astam adamǵa qyzmet kórsetkenin anyqtap otyr. Olardyń qaısysynyń emtıhandy adal tapsyrǵany, qaısysynyń qylmystyq toptyń kómegine júgingeni tergeý amaldary barysynda anyqtalady.
Qostanaı oblysy
