Taıaýda Energetıka mınıstrligi fermerler úshin dızel otynynyń baǵasy ózgerissiz qalady dep málimdegen. Bizge oblys ákimdigi arqyly jetken resmı aqparatta janarmaı beketterinde 1 tonna dızeldi otynnyń baǵasy 222 myń teńge nemese 1 lıtri 184 teńge bolatyny aıtylǵan. Aýylsharýashylyq taýaryn óndirýshiler operatorlarynyń shyǵynyn qosa eseptegende, 1 lıtr dızel otynynyń baǵasy orta eseppen 204 teńge bolady.
Bıyl Qostanaı oblysyna memleket kóktemgi alqap jumystaryn oıdaǵydaı atqaryp alý úshin 413 myń tonna jeńildetilgen janarmaı bólip otyr.
Mınıstrliktiń málimetinshe, jeńildetilgen janarmaı AShTО́ operatorlaryna belgilengen ýaqytqa saı jiberilip jatyr. Máselen, aqpan aıynda 82,1 myń tonnanyń 77,4 tonnasy, naýryzda 102,2 myń tonnanyń 78,4 tonnasy jóneltilgen. Eń bastysy, ótinimder men tólemder keshikpeı, der kezinde vagon-sısternalarmen qamtamasyz etý otyrý mańyzdy.
О́ńir sharýashylyqtarynyń birazy kóktemgi egis naýqanyna jetetin janarmaı qoryn baǵa qymbattamaı turyp jınap alǵan. Sondyqtan sharýalardy kóktemgi dán sińirý jumystarynan góri, odan keıingi alqapty óńdeý, shóp shabý kezindegi, sondaı-aq kúzgi jıyn-terin naýqanyndaǵy janarmaı baǵasynyń qalaı bolatyny kóbirek alańdatady.
О́ıtkeni budan keıin jeńildetilgen dızel otyny qazirgi naryqtaǵy baǵasynan nebári 5-10 teńge arzan berilýi múmkin. Munyń syrtynda, janarmaıdan soń ile-shala tehnıka, qosalqy bólshekter, azyq-túlik, elektr energııasy, ózge de aýyl sharýashylyǵymen tyǵyz baılanysty qyzmet túrleri qymbattap ketýi múmkin.
Birtindep oblysqa kelip jatqan jeńildetilgen janarmaıǵa áli qol jetkize almaı otyrǵan sharýashylyqtar da bar.
– Bizge janarmaı túgili, áli lımıtti de bergen joq. Jylda ár sharýashylyqta qansha ylǵal jabylady, neshe gektarǵa egin egiledi, bárin eseptep, soǵan oraı lımıt beretin. Sol lımıtti áli alǵan joqpyz. Osynyń bári quddy ádeıi istelip jatqan sııaqty kórinedi keıde. Nege osy bizde janarmaı únemi naýqan ábden taıaǵan kezde ǵana qymbattaıdy? Jazda nemese qysta nege qymbattamaıdy? Joq, jurttyń bári tıyn-tebenin ár nársege zorǵa jetkizip jatqanda qylǵyndyryp, jyǵylǵanǵa judyryqtyń kerin keltiredi. Sherhan Murtazasha aıtsaq, «japalaqty tasqa ursań da japalaq óledi, tasty japalaqqa ursań da japalaq ólediniń» kebin kıip otyrymyz. Shynymdy aıtsam, bizdiń sharýashylyq memlekettiń qoladaýyna muqtaj emes. Biz osy arzan janarmaısyz da jer jyrtyp, egin ege alamyz. Men tehnıkasy eski, qaltasy taqyl-tuqyl shaǵyn sharýashylyqtardyń erteńgi kúni ne bolady dep alańdaımyn. Olar jarytyp ónim alyp jatpasa da, sol mańaıdaǵy birdi-ekili aýyldarǵa es bolyp otyr ǵoı, – deıdi tájirıbeli dıqan Ybyrash Estaev.
