Túrkııa prezıdenti Rejep Taıyp Erdoǵan Gazıantep provınsııasynyń Nýrdagy aýdanynyń Belpynar aýylynda, Kahramanmarash provınsııasynyń Mesthıýıýk jáne Túrkoǵly О́zbek aýyldarynda jeke úılerdiń kiltin tapsyrý rásimine qatysty.
Prezıdent saltanatty sharaǵa qatysýshylardy Ramazan merekesimen de quttyqtady.
«6 aqpandaǵy joıqyn jer silkinisinen 15 kún ótken soń, jańa úılerdiń fýndamenti qalandy. Apat aımaǵynda barlyǵy 507 myń páter men 143 myń jeke úı salynady. Olardyń 319 myńy bıyl tapsyrylady dep josparlanyp otyr. 60 myńǵa jýyq páterdiń fýndamenti qalandy. Bul jumystar úzdiksiz jalǵasyp jatyr. Bizdiń mindetimiz jer silkinisinen zardap shekken azamattardy múmkindiginshe tezirek jańa zamanaýı úılerge kóshirý», dedi prezıdent quttyqtaý sózinde.
Túrkııa prezıdentiniń aıtýynsha, apat aımaǵyndaǵy barlyq qalalar men aýyldardyń ınfraqurylymy jańartylyp jatyr. Bul baǵytta birneshe memlekettik baǵdarlama qabyldandy. Olardyń biri fermerlerdi paıyzsyz nesıelermen qamtamasyz etýge baǵyttalǵan.
Aıta ketsek, Gazıantepte josparlanǵan 50 myń páterge qosymsha taǵy 50 myń páter salynbaqshy.
Rejep Taıyp Erdoǵan jańa úı ıelerine kiltterin tabystap, jer silkinisinen zardap shekken azamattarǵa kómek kórsetiletinin qaıta atap ótti.
Eske sala ketsek, 6 aqpanda Túrkııanyń Kahramanmarash provınsııasynda eki joıqyn jer silkinisi boldy. Olardyń magnıtýdasy 7 baldan asty. Dúmpýler eldiń 10 provınsııasynda, sondaı-aq kórshiles memleketterde, sonyń ishinde Sırııada da sezildi. Tabıǵı apattan Túrkııaǵa 105 mlrd dollardan astam shyǵyn keltirdi.
6 aqpan men 31 naýryz aralyǵynda 22,5 myń jerasty dúmpýi tirkeldi.
Sońǵy resmı derekterge sáıkes, zilzala saldarynan 50 096 adam kóz jumsa, taǵy 107 204 adam zardap shekti.
