Qasym-Jomart Toqaev Petr Fıalanyń elimizge jasaǵan alǵashqy resmı sapary ekijaqty qatynastardy nyǵaıtýǵa yqpal etetinine senim bildirdi.
«Siz elimizge úlken bıznes-delegasııa alyp keldińiz. Eki el arasyndaǵy iskerlik baılanystar men yntymaqtastyqty ilgeriletýge paıdasy óte zor bıznes forým ótedi», dedi Qasym-Jomart Toqaev.
Kezdesý barysynda saýda-ekonomıkalyq jáne ınvestısııalyq yntymaqtastyqty, sonyń ishinde kólik-logıstıka salasyn nyǵaıtý perspektıvalaryna basa mán berildi. Prezıdent cheh ınvestorlaryna jan-jaqty qoldaý kórsetýge daıyn ekenin aıtty.
«Chehııa Respýblıkasynan energetıka, mashına jasaý, kólik, aýyl sharýashylyǵy, qarjy, medısına ónerkásibi jáne farmasevtıka sekildi ekonomıkanyń túrli salalaryna quıylatyn ınvestısııany quptaımyz. Sondaı-aq elderimizdiń astanalary arasynda tikeleı áýe qatynasyn ashamyz dep senemiz», dedi Memleket basshysy.
Petr Fıala Chehııanyń elimizben aradaǵy yntymaqtastyqty odan ári damytýǵa nıetti ekenin rastady.
«Chehııa Respýblıkasy Qazaqstanmen burynnan dostyq qarym-qatynas ornatqan jáne ony jalǵastyramyz dep senemiz. Osy kezdesýimiz belsendi baılanystarǵa tyń serpin beredi dep úmittenemin. Qazaqstan – biz úshin óte mańyzdy seriktes. Qazaqstan men Chehııa Respýblıkasynyń yntymaqtastyǵy Eýropalyq Odaq pen Ortalyq Azııa elderi arasyndaǵy qarym-qatynastardyń asa mańyzdy tireginiń biri sanalady», dedi Chehııa Premer-mınıstri.
