Dúnıe júzin kezekti ret moıyndatqan dombyrashylar dýetiniń músheleri Temirlan men Ernat Roza Baǵlanova atyndaǵy «Qazaqkonsert» uıymynyń solısteri ekenin eske sala keteıik.
– Italııadaǵy bedeldi baıqaýǵa Mádenıet jáne sport mınıstrliginiń qoldaýymen bardyq. Jyl saıyn Pesaro qalasynda ótetin is-sharaǵa bıyl 24 eldiń ónerpazdary qatysty. Álem kóz tikken baıqaýda úzdik atanǵanymyzǵa qýanyshtymyz, – deıdi Temirlan Oljabaı.
Dombyrashylar dýeti «Adaı», «Kóroǵly», «Álqıssa» kúılerin, O.Súleımenovtiń «West» shyǵarmasyn oryndap, qazylar alqasy men kórermenderdi baýrap alǵan.
– Temirlan men Ernatty jarqyn jeńisimen quttyqtaımyn. Jigitterdiń qazaq mýzykasyn oryndaı otyryp, halyqaralyq deńgeıde jetistikke jetkeni qýantady. Olardyń óneri basqa talantty otandastarymyzdy shabyttandyratynyna senimdimin, – deıdi Mádenıet jáne sport mınıstri Ashat Oralov.
Aıtpaqshy, dombyrashylar dýeti osy jyldyń 18 maýsymynda Astanada alǵashqy shyǵarmashylyq keshin ótkizedi. Oǵan kesh qonaqtary retinde Amre, Qazybek Quraıysh sekildi óner juldyzdary da qatysady dep kútilip otyr.
