Soltústik Qazaqstan oblysynyń polısııa departamenti usynǵan aqparatqa sáıkes, Petropavlda «aqyldy» beınekameralardyń jumysyn taldaı otyryp, ákimshilik polısııa qyzmetkerleri qaskúnem buzýshyny anyqtady.
Ol sheteldik tirkeýde turǵan «Lada Priora» avtokóligimen júrip, jarty jyldyń ishinde jyldamdyqty 68 ret asyryp, toqtaý syzyǵynan ótip ketken.
Aıyppuldyń jalpy somasy 1,5 mln teńgeni qurady.
35 jastaǵy sheteldikke qysqartylǵan tártippen 700 myń teńgeden astam aqsha tóleýge týra keldi.
Polıseılerdiń aıtýynsha, osyǵan uqsas birneshe buzýshylyq tirkelgen.
Jaqynda Petropavl qalasynyń polıseıleri bir aıda belgilengen jyldamdyqty 32 ret asyrǵan 22 jastaǵy jigitti jaýapqa tartty.
Saýmalkól eldi mekeninde taǵy bir «jyldam aıdaýdyń áýesqoıy» toqtatyldy. Aıyrtaý aýdanynyń 27 jastaǵy turǵyny bıyl 16 ret jol qozǵalysy erejesin buzǵan eken.
Ekeýi de reseılik esepte turǵan «VAZ» avtokólikterin basqarǵan. Olar «aqyldy» beınekameralardyń kómegimen anyqtaldy.
«Oblysta jol qozǵalysy erejesin buzý derekterin avtomatty túrde tirkeıtin 35 vıdeojúıe jumys isteıdi. Apparattyq-baǵdarlamalyq keshender jol-kólik oqıǵalaryn jıi týdyratyn baǵdarshamnyń tyıym salý sıgnalyna ótý, jyldamdyq rejımin buzý faktilerin anyqtaıdy. Jyl basynan beri mundaı apparattardyń kómegimen SQO joldarynda 20 myńnan astam quqyq buzýshylyq anyqtaldy», deıdi ákimshilik polısııa basqarmasynyń bastyǵy Serik Áljanov.
