Marafonnyń ashylý saltanatyna Astana qalasy ákiminiń orynbasary Erlan Bekmurzaev, «Bolashaq» qorynyń Qamqorshylyq keńesiniń tóraıymy Dınara Gaplan qatysyp, qatysýshylarǵa sáttilik tiledi.
«Is-shara aýtızm dıagnozy bar adamdardyń ómir súrý sapasyn jaqsartý jáne olardyń qoǵamnan óz ornyn tabýy maqsatynda ótkizilip jatyr. Mundaı jarystardy aldaǵy ýaqytta da dástúrli túrde ótkizip turý josparda bar», dedi qala ákiminiń orynbasary.
Uıymdastyrýshylardyń aıtýynsha, satylymdaǵy bıletterden túsken 6 mln teńgeden astam qarajat «Bolashaq» qorynyń «Ár bala mektepke barýǵa laıyqty» jobasy sheginde aýtızmi bar jáne basqa da mentaldi buzylýshylyqtary bar balalarǵa arnalǵan ınklıýzıvti bilim berýdi damytýǵa baǵyttalady.
«Qaıyrymdylyq is-sharasyna kásibı, áýesqoı sportshylardan bastap erekshe qajittiligi bar 16 bala men olardyń ata-analary qatysty. Olar tórt qashyqtyq boıynsha synǵa tústi. Sondaı-aq bul jarysqa astanalyqtardan bólek Almaty, Qaraǵandy, Qostanaı, Pavlodar, Temirtaý jáne Semeı sııaqty basqa qalalardan kelgen qatysýshylar da qatysty. Aýtızm jáne damýynda basqa da erekshelikteri bar balalarǵa arnalǵan «Kóńildi starttar» sporttyq-oıyn-saýyq estafetasy uıymdastyryldy», delingen qala ákimdigi baspasóz qyzmetiniń habarlamasynda.
Komandalyq oıyndarǵa 5 jáne 14 jas aralyǵyndaǵy aýtızmi bar, psıhıkalyq jáne sóıleý tili damýy tejelgen, daýn sındromymen jáne t.b. 100-den astam bala qatysty. Estafeta qorytyndylary boıynsha árbir jas qatysýshyǵa medal jáne is-sharanyń seriktesinen syılyq qorapshasy tabystaldy.
Sonymen birge balalar arasynda balalar velosıpedteri de oınatyldy. Jarys tórt qashyqtyq boıynsha ótti: 1 km, 2,5 km, 5 km jáne 10 km. Qatysý quny 4 990 teńgeden 7 990 teńgege deıin boldy. Qaıyrymdylyq marafonyna barlyǵy 1 017 adam qatysty.
Ár qashyqtyqtan júldeli oryndarǵa ıe bolǵan jarys jeńimpazdary is-sharanyń ataqty sportshylary men seriktesteriniń qolynan dıplomdar men medaldar aldy. Márege jetken barlyq qatysýshylar estelik medaldarǵa ıe boldy. Júgirý marafony Astana qalasy ákimdiginiń qoldaýymen ótti.
