Memleket basshysy qonaqtarǵa iltıpat bildire otyryp, Astanada ótken bedeldi týrnırdiń joǵary deńgeıde uıymdastyrylǵanyn atap ótti.
«Men, eń aldymen, Dın Lıjen myrzany tartysty ótken saıysta álem chempony ataǵyn jeńip alýymen quttyqtaǵym keledi. Sondaı-aq grossmeıster Iаn Nepomnıashııge kórsetken sheberligi úshin qurmetimdi bildiremin. Álemniń búkil shahmat qoǵamdastyǵy týrnırge nazar aýdardy. Shahmat jankúıerleri sharshy taqtadaǵy oıyndy jiti baqylady. Týrnır sátti ótti dep esepteımin», dedi Prezıdent.
Memleket basshysy Qazaqstanda shahmatty damytýǵa aıryqsha kóńil bólinetinin aıtty.
«Búginde elimizde 200 myńnan asa adam shahmatpen shuǵyldanady. Qazaqstan Respýblıkasy Shahmat Federasııasynyń kómegimen jáne FIDE-niń atsalýymen bul kórsetkish keminde eki ese artýǵa tıis. Qazaqstanda shahmat tıisti deńgeıde damıdy», dedi Qasym-Jomart Toqaev.
Kezdesý sońynda Prezıdent shahmatshylardyń bıik belesterdi baǵyndyrýyna tilektestik bildirdi. Sondaı-aq FIDE-men aradaǵy yntymaqtastyqty odan ári jalǵastyrý mańyzdy ekenin atap ótti.
