Májilis otyrysynda depýtat qoǵamǵa keri áser etip jatqan blogerlerge qatysty másele kóterdi. Olar aqparattyń dáıektiligin teksermeı, «feık» taratyp jatady. Alaıda, sol úshin jaýapkershilik alyp, jazalanyp jatqandar az. Osyǵan baılanysty májilis depýtaty blogerlerdiń jaýapkershiligin kúsheıtý keregin jetkizdi.
Májilis depýtatynyń aıtýynsha, dál osy blogerler talaı jyldan beri umyt bolǵan qarjy pıramıdalarynyń jandanýyna da sebep bolyp otyr.
«Elde bolyp jatqan túrli áleýmettik jaǵdaılardy óz yńǵaıyna burmalap, oǵan ultaralyq reń berip, elge jalǵan aqparat taratqan blogerlerdiń de isi maıshammen qaralýy kerek edi. Rastalmaǵan qaýesettiń áleýmettik jeli arqyly tez taraýynan Qordaı oqıǵasynyń nemen aıaqtalǵany bárińizge málim», dedi depýtat.
Anas Baqqojaev sapaly kontent qalyptastyryp júrgen blogerlerdiń baryn joqqa shyǵarmaıtynyn aıtty. Degenmen, jalǵan aqparat taratyp, halyqty aldap júrgenderdiń sańyraýqulaqsha qaptap ketkenin de eske saldy.
«Biz qysqa ǵana ýaqyt ishinde sózi men isine jaýap bere almaıtyn blogerlerdiń otanyna aınalyp ketkendeımiz. Bul - qoǵam úshin de, memleket úshin de qaýipti qubylys. Munyń bári bizdegi zańnamada bloger mártebesi aıqyndalmaǵannan bolyp otyr. Jaýapkershiliktiń joq ekenin sezingen mundaı adamdar árıne, oıyna kelgenin isteıdi. Kópke topyraq shashýdan aýlaqpyn. Halyqqa shyn janashyr blogerler de az emes. Kópbalaly jalǵyzbasty analarǵa, múgedek jandarǵa járdem berip, áleýmettik jeli arqyly halyqqa paıdasyn tıgizip júrgen jerlesterime tek bas ıemin. Oqyrmanǵa qyzyqty ári paıdaly aqparat taratyp, jeke blogyn júrgizip júrgenderge de aıtar daýymyz joq», dedi ol.
