«О́ner ataýly adamnyń sezimin oıatyp, oıyn ushqyr etip, tyń ıdeıalarǵa shabyttandyrýymen asqaq, sonysymen tartymdy. Biz tarıhı muramyzdy saqtap, ulttyq taqyryptaǵy spektaklder shyǵarýǵa kúsh salyp kelemiz. Sol sebepti «Jeti qazyna» spektakli biz úshin qundy. Onyń erekshe bolatyn taǵy bir sebebi, bul – «Ashyq sahna» I respýblıkalyq baıqaýynyń jeńimpazdary sahnalaǵan dúnıe. Bul – elimizdiń teatr ónerindegi jańa esimder», dedi teatrdyń kórkemdik jetekshisi Nurlan Kanetov.
«Bul taqyryptyń aýqymy keń. Biraq, ol osy kúnge deıin balette kórinis tapqan joq. «Jeti qazyna» baletinde bas keıipker tulǵa bolyp qalyptasý, eseıý kezeńinen ótip, boıyndaǵy úreıin, álsizdigin jeńip, janynda serigi – jarymen birge shashyrap ketken qazynany jınaıdy. Syńarymen birlesken soń ǵana ol Shańyraqty qalpyna keltire aldy. Shańyraqty biz adam balasynyń jolyna sáýle túsiretin Kún beınesinde sýrettedik», dedi lıbretto avtory Mádına Aldanova.
Astanalyq teatr tyń, biregeı ıdeıalardy izdep, ony júzege asyryp, horeografııa ónerindegi jańa esimderdi kópshilikke pash etýge kúsh salyp júrgenin atap ótken jón. Jańa spektakl osynyń taǵy bir dáleli bolsa kerek.
«Jumys barysynda lıbretto men mýzykadan shabyt aldym. Spektaklde naqty bir stıl joq deýge bolady. Bul – birneshe bı baǵytynyń sıntezi. Halyq bıi men klassıkalyq qımyldar, arasynda, bálkim, ózim tapqan dúnıeler bar. Sebebi ár keıipkerdiń plastıkalyq kelbetin ashýǵa tyrystym. Ár keıipker ózinshe dara, biregeı. Shyǵarmashylyq izdenisten lázzat aldym desem, artyq emes. Bul men qoıǵan tuńǵysh balet bolǵanymen, jalpy, bı salasyndaǵy alǵashqy eńbegim emes», deıdi Ýálıtbek Sııazbek.
Jańa qoıylymnyń jetekshi partııalaryn «Astana Balet» teatrynyń ártisteri somdady. Er jigit – jetekshi solıst Súndet Sultanov, Aq jaýlyq – ekinshi solıst Álııa Aıtbaeva, Tulpar – ekinshi solıst Aıdan Qaljan, Qyran búrkit – jetekshi solıst Nazerke Aımuhametova, Qumaı tazy – balet ártisi Aqqalı Turǵalı.
Saltanatty is-shara Mádenıet jáne sport mınıstrliginiń qoldaýymen júzege asty.
