Kollajdy jasaǵan Qonysbaı ShEJIMBAI, «EQ»
Qulashyn keńge sermep bara jatqan elimizdiń «bultty» servıster naryǵy zertteý agenttikteri deregine sáıkes, byltyr 23,7 mlrd teńgeni qurasa, 2027 jylǵa qaraı memlekettik servısterdi qosa alǵanda 72,5 mlrd teńgege jetedi degen boljam bar.
Almatyda «QazCloud» jáne «VK Cloud» kompanııalary áriptestigi aıasynda ótken konferensııada elimizdegi «bultty» tehnologııalardyń bolashaǵy, IT-naryǵyndaǵy trendter jáne kıberqaýipsizdik máselesi talqylandy. «VK Cloud» «bultty» platformalaryn otandyq naryqqa beıimdeý elimizdegi «bultty» servısterdi damytý qajettiliginen týyndap otyr. Atalǵan platforma «QazCloud» derekter ortalyǵynda jumys isteıtin bolady.
«QazCloud», «VK Cloud» bultty platformalary shaǵyn jáne iri bıznes pen startaptardyń sandyq jobalaryn damytý, naryqqa jyldam ıkemdeý sersıvimen erekshelenedi. «Bultty» platforma 20-dan astam konfıgýrasııalanǵan «IaaS» jáne «PaaS» qyzmetteriniń jıyntyǵy retinde kásiporyndardyń derekterin saqtaýmen qatar sanaýly mınýt ishinde ınfraqurylymdy ornalastyrý, aqymdy derekterdi ázirleý men óńdeýde zamanaýı áleýetke ıe.
«VK Tech» basqarýshy dırektory Pavel Gontarevtyń aıtýynsha, «bultty» qyzmetter sıfrlyq ónimder ázirleý men damytýdyń standartyna aınalyp, naryqqa shyǵarýdy jedeldete otyryp, básekelestik artyqshylyǵyn qamtamasyz etedi. Olar ıkemdi IT-ınfraqurylym túzý, kıberqaýipsizdikti, derekterdi saqtaý, óńdeýmen qatar ML-modelderimen jumys isteýge deıingi kezeńdi qamtıdy. «VK Cloud» platformasynyń Qazaqstandaǵy «QazCloud» seriktestiginiń jergilikti derekter ortalyǵynda ornalasýy ınfraqurylymmen qamtamasyz etýge ǵana emes, derekterdiń joǵary deńgeıde qorǵalýyna yqpal etedi.
«QazCloud» ınfraqurylym provaıderi IT-ınfraqurylymdy qoldaý, qyzmet kórsetý men jańǵyrtý, vırtýal resýrstardy jalǵa alý jáne ornalastyrý, IT-aýtsorsıng, aqparat qaýipsizdigi jáne júıelerdi tehnıkalyq súıemeldeýimen erekshelenedi. «QazCloud» bas dırektory Qasym Esergepov atap ótkendeı, Astanada jasyl tehnologııalar boıynsha salynǵan «QazCloud» data-ortalyǵy «VK Cloud» lokaldy platformasymen birlesip, otandyq IT-mamandarǵa barlyq qajettilikti el aýmaǵynda artyq shyǵynsyz alýǵa kómektesedi. «Qazirgi kezde elimizdegi kóptegen kompanııa óz derekterin «Google», «Amazon», «Yandex» sııaqty shetel platformalarynda saqtaýǵa májbúr. Búginde atalǵan kompanııalardyń ózi jeke derekteriniń qupııalylyǵyna asa mán berýde. Endigi kezekte «bulttyq» servıstik platformalardyń óz elimizde damýy otandyq kompanııalar derekteriniń ashyqtyǵy men qaýipsizdiginiń kepili bola alady. Otandyq kompanııalarǵa tıesili derekterdiń shetelderde emes, otandyq «bultty» platformalarda saqtalýy kóptegen máseleniń sheshilýine yqpal etedi», deıdi Qasym Esergepov.
«QazCloud» V2V korporatıvti klıenttermen jumys jónindegi dırektory Meıirjan Omarov bultty platformalardyń otandyq kompanııalar, startaptar úshin tıimdiligi joǵary ekenin aıtty. Otandyq IT-naryq damyp keledi degenimizben, bizdegi platformalarda servıster az. Elimizdegi shaǵyn jáne orta bıznestiń 60 paıyzdan astamy «Google», «Amazon», «Microsoft», «Yandex.Cloud» sııaqty sheteldik servıster qyzmetine júginýge májbúr. Olardyń óńdeý ortalyqtary Eýropada, Qytaıda, basqa da elderde ornalasqandyqtan, servıstik derekter de shetelder aýmaǵynda saqtalady. Al softtardyń qashyqtyǵy jergilikti kompanııalar úshin ınternet qoljetimsiz bolǵan jaǵdaıda qolaısyzdyqtar men táýekelder týǵyzady.
Búginde «QazCloud» platformasynda 400-den astam otandyq IT-maman jumys isteıdi. Jergilikti ýnıversıtetterdiń túlekteri men stýdentteri atalǵan platformada tájirıbeden ótip, taıaý bolashaqta salada kásibı mamandardyń artýyna yqpal etedi. «Osy oraıda joǵary oqý oryndaryndaǵy stýdenttermen IT-komıýnıtıler ótkizý, ártúrli qoǵamdyq jumystarǵa tartý, motıvasııa berý, granttyq jobalar jasaý sıfrly tehnologııalardy meńgergen mamandardyń ósýine yqpal etedi. Qazirgi kezde elimizdegi sıfrly naryqtyń damýyna IT-mamandardyń jetispeýshiligi kedergi bolyp otyr. Sonymen qatar sheteldik platformalarda jumys istep, tájirıbeden ótip jatqan IT-mamandardyń elge kelgeni mańyzdy», deıdi M.Omarov.
«VK Tech» kompanııasynyń kópjyldyq tájirıbesin paıdalaný, bultqa negizdelgen platformalaryn ıgerý el naryǵynda IT-mamandardyń jańa tolqynynyń, zamanaýı servısterdiń damýyna serpin beredi. Osy tusta sarapshylardyń myna pikirine nazar aýdara ketkendi jón kórip otyrmyz. Búginde otandyq IT-mamandardyń biliktiligi joǵary ekenin halyqaralyq sıfrly keńistiktegi suranysqa qarap eksheýge bolady. Sondaı-aq elimizdiń bank sektory, memlekettik servısterdiń sapasyna da ózge elder tarapynan qyzyǵýshylyqtyń týyndap otyrǵany memlekettiń sıfrlyq saıasatynyń tıimdiligi men IT-mamandar biliktiliginiń joǵarylyǵymen baılanysty.
ALMATY
