Qytaıdyń Qazaqstanmen vızasyz rejim ornatýǵa qadam basýynyń astarynan elimizge qarsy jymysqy saıası ilik izdeý durys emes. Alaıda bul esikti aıqara ashyp qoıyp, kóringen kók attyny ishke kirgize berý degen de sóz emes. Budan bylaı kóshi-qon salasyna jaýapty quzyrly organdar shekaradan kirgen-shyqqan adamdardy burynǵydan da jiti qadaǵalaýǵa alyp, tııanaqty jumys júrgizýi kerek. Qytaıdyń elimizge qatysty jymysqy saıasaty bolmasa da, ol jaqtan keletinderdiń qandaı adamdar ekenin, qandaı pıǵyly baryn kim bilsin? Sondyqtan Ishki ister mınıstrligi men Ulttyq qaýipsizdik komıteti elimizge kiretin sheteldikterdiń júris-turysyn, is-áreketterin qatań baqylaýǵa alatyn bolsa, biz eki el arasyndaǵy qabyldanyp jatqan osy sharalarǵa úrke qaramaýymyz kerek.
Qazaqta «Tórimizge shyǵaramyz, biraq tóbemizge otyrǵyzbaımyz» degen sóz bar. Vızasyz rejim jaǵdaıynda da osy qaǵıdany basshylyqqa alǵanymyz durys. Bir mysal aıtaıyn, Dýbaıǵa qarańyz. Onyń jer astyndaǵy baılyǵy bizdiń Atyraý men Mańǵystaýdan asyp bara jatqan joq. Biraq arabtar týrızmge barlyq jaǵdaıdy jasap qoıǵan. Sonyń arqasynda álemge tanyldy, týrıster arqyly túsken paıdasy shashetekten, halqy baqýatty. Qazirgi kúni qytaılar – álemdegi eń kóp saıahattaıtyn halyqtardyń biri. Olardy bizdiń elge qaraı tartatyn bolsaq, munda kelý úshin mindetti túrde ushaǵymyzǵa otyrady, qonaqúıimizdi jaldaıdy, meıramhanamyzdan dám tatady, taksıge otyrady, osynyń bári – elge shetten kirip jatqan tabys.
Sondyqtan Qytaımen arada vızasyz rejim engizilýin qoldaımyn. Tek joǵaryda aıtqanymdaı, árbir sheteldikti baqylaýǵa alyp, qadaǵalaýdy ustaý jaǵyn bosańsytyp almasaq boldy.
Jádı ShÁKENULY,
jazýshy
