Derek kózderine júginsek, ótken jyly oblysta turmystyq zorlyq kórgen 86 áıel quqyq qorǵaýshylar kómegine júginip, olardyń barlyǵy Almaty qalasyndaǵy daǵdarys ortalyǵyna jiberilgen.
– Byltyr oblysta kisi qolynan alty áıel qaza tapty. Otbasylyq-turmystyq qatynastar salasynda 27 qylmys jasalyp, zorlaý faktisi tirkelgen. Eger kúıeýi qorlyq kórsetip, jıi qol jumsasa dereý senim telefonyna habarlasý kerek. Bizde 1307 nómirli Sall ortalyq jáne senim telefony bar. Osy baılanys nómirlerine habarlama kelip túsken jaǵdaıda aýdandyq jedel ýákil men ınspektorlar mekenjaıǵa baryp, janjaldyń sebep-saldary anyqtalady. Kúsh kórsetken joldasyna nemese ózge týystaryna qatysty ákimshilik nemese qylmystyq jaza qoldanylady. Al jábirlenýshiniń barlyq quqyǵy men qaýipsizdigi zańmen qorǵalady, – deıdi oblystyq PD jergilikti polısııa basqarmasynyń aǵa ınspektory Dınara Aıatbekova.
«Bir kún urys bolǵan úıden qyryq kún yrys ketedi» dep beker aıtpasa kerek. Janjal, aıqaı-shý bolǵan úıdiń berekesi qashyp, oǵan qosa balalardyń boıyn qorqynysh bıleri sózsiz. Osyndaı kúıge túsken ana men balaǵa jańa ashylǵan ortalyq pana bolýdy maqsat etip otyr. Munda psıhologııalyq, quqyqtyq jáne medısınalyq qyzmet túrleri tegin kórsetiledi. Mekemege taǵdyr taýqymetin tartyp, otbasylyq qıyndyqqa tap bolǵan áıelder qabyldanady. Eger turmystyq jaǵdaıy jaqsarmaǵan jaǵdaıda bul jerde alty aıǵa deıin turýyna bolady. О́zderi qalaǵan ispen aınalysýyna, aıtalyq kıim tigip, bilimderin jetildirýine de jaǵdaı jasalǵan. Ortalyq dırektory Raýshan Alpysbaevanyń aıtýynsha, mundaǵy mamandar aýdandardaǵy jumyspen qamtý ortalyǵyna shyǵyp, japa shekken áıelderdi 3 aılyq kýrstarǵa oqytyp, ıkemi bar kásippen aınalysýyna kómek berip keledi.
Sondaı-aq oblys aýmaǵynda ómirlik qıyn jaǵdaılarǵa tap bolǵan áıelderge «Zorlyq-zombylyqqa jol berme» áıelder men balalardy qoldaý ortalyǵynyń qoǵamdyq birlestigi, «Azamatsha.kz qaıyrymdylyq qory» jáne «Januıa» qoǵamdyq birlestikteri kómek kórsetýmen aınalysyp keledi.
Almaty oblysy
