Otyrysqa Ulttyq ekonomıka birinshi vıse-mınıstri Tımýr Jaqsylyqov, Qarjy naryǵyn retteý jáne damytý agenttigi tóraǵasynyń birinshi orynbasary Nurlan Ábdirahmanov, Aýyl sharýashylyǵy vıse-mınıstri Rústem Qurmanov, Indýstrııa jáne ınfraqurylymdyq damý vıse-mınıstri Almaz Ydyrysov jáne ekinshi deńgeıdegi bankterdiń, memlekettik jáne kvazımemlekettik organdardyń ókilderi qatysty.
Jıyn barysynda parlamentshilerge Memleket basshysynyń ekonomıkanyń naqty sektoryna nesıe berý bóligindegi tapsyrmalaryn oryndaýdyń aralyq nátıjeleri týraly baıandaldy.
Dóńgelek ústeldi júrgizgen Qarjy jáne bıýdjet komıtetiniń tóraǵasy, senator Sultanbek Mákejanov sońǵy eki jylda álemdik ekonomıka pandemııa men aýqymdy saıası kataklızmderge baılanysty daǵdarysty bastan keshirgenin, onyń quramdas bóligi retinde bizdiń el ekonomıkasy da aıtarlyqtaı qıyndyqtarǵa tap bolǵanyn aıtty. Sondyqtan daǵdarysty eńserý jáne ekonomıkanyń odan ári damýyn yntalandyrý úshin tıisti sharalar qabyldaý qajettiligi týyndap otyr. «Osyndaı sharalardyń biri – otandyq ekonomıkaǵa nesıe berýdi keńeıtý», dedi ol.
– Nesıeleý – damýdyń mańyzdy fýnksııalarynyń biri. Naryqtyq ekonomıka jaǵdaıynda nesıeler ekonomıkanyń qajetti aınalym qarajattaryna degen qajettilikterin qanaǵattandyra otyryp, onyń úzdiksiz jumysyn qamtamasyz etedi. Elimiz úshin shıkizattyq ekonomıkaǵa, túpkilikti taýarlar men kórsetiletin qyzmetterdiń otandyq óndirisi salasyna nesıe berý erekshe mańyzdy. Osy maqsatta Memleket basshysy 2023 jylǵy 10 naýryzdaǵy «Ekonomıkanyń naqty sektoryna kredıt berýdi keńeıtý jáne halyqtyń shamadan tys kredıt alýyn azaıtý jónindegi sharalar týraly» Jarlyǵynda otandyq kásipkerlik sýbektileri men elimizdiń halqyn qoldaýǵa baǵyttalǵan birqatar tapsyrma berdi, – dedi senator.
Dóńgelek ústel basynda Ulttyq ekonomıka vıse-mınıstri Tımýr Jaqsylyqov, Qarjy naryǵyn retteý jáne damytý agenttigi tóraǵasynyń birinshi orynbasary Nurlan Ábdirahmanov, Aýyl sharýashylyǵy vıse-mınıstri Rústem Qurmanov sóz alyp, óz vedomstvolary tarapynan Memleket basshysynyń ekonomıkanyń naqty sektoryna nesıe berýdi keńeıtý jónindegi tapsyrmalaryn iske asyrý boıynsha atqarylyp jatqan jumystaryn baıandady. Olar atalǵan tapsyrmalardyń oryndalýy boıynsha jáne kún tártibindegi problemalar týraly aıtyp, olardy sheshý boıynsha usynystaryn jetkizdi.
«Búgingi dóńgelek ústelde jemisti jumys atqaryp, ázirlengen usynymdar otandyq ekonomıkanyń damýyna yqpal etedi. Qarjy jáne bıýdjet komıteti depýtattarynyń tarapynan atalmysh másele boıynsha depýtattyq saýaldar joldaý, túrli is-sharalar ótkizý jáne zań shyǵarý barysynda osy baǵyttaǵy jumystar jalǵasyn tabady», dedi otyrysty qorytyndylaǵan Sultanbek Mákejanov.
