Boksshylardy osyndaı tamasha jetistigimen Memleket basshysy Qasym-Jomart Toqaev quttyqtady.
Eki aptaǵa jalǵasqan dúnıejúzilik dodada jer-jahannyń 107 memleketinen kelgen 538 boksshy baq synap, 13 salmaq dárejesiniń túrli-tústi medalin sarapqa saldy. Solardyń ishinen tek 11 eldiń boksshylary fınalǵa deıin alqynbaı jetip, álem chempıony ataǵy úshin aıqasty.
Álem chempıonatyna tolyq quramda barǵan el quramasy ókilderinen segiz boksshymyz jarty jolǵa jetpeı súrinse, qalǵandary jarysty jalǵastyrýǵa múmkindik aldy. Jartylaı fınalda óner kórsetken bes otandasymyzdyń barlyǵy da sátti óner kórsetip, fınaldyq saıysqa joldama aldy. Áýelde bes boksshymyzdyń eń bolmasa ekeýi altyn medal alsa, sonyń ózi úlken jetistik dep topshylaǵanbyz. Alaıda, nátıje biz kútkennen de keremet bolyp shyqty.
Sóıtip, mıllıondaǵan jankúıer taǵatsyzdana kútken fınaldyq jekpe-jek eki kúnge jalǵasyp, burnaǵy kúni eki otandasymyz altyn úshin aıqasty. Alǵash bolyp rıngke asa jeńil salmaqtaǵy Sanjar Táshkenbaı kóterildi. Fınalǵa deıin О́zbekstan, Japonııa, Reseıdiń eń myqty degen boksshylaryna des bermegen otandasymyz fınalda byltyrǵy Eýropa chempıony, Serbııadaǵy álemdik jarystyń qola júldegeri grýzııalyq Sahıl Alahverdovıdımen judyryqtasyp, qarsylasynyń adymyn ashtyrǵan joq. Úsh raýnd boıy damylsyz qımyldap, Sahıldi soqqynyń astyna aldy. Sóıtip 19 jastaǵy jerlesimiz el boksynyń tarıhynda eń jas álem chempıony atandy. Buǵan deıingi bul jetistik Jánibek Álimhanulyna tıesili bolatyn. Ol 2013 jyly Almatyda ótken álem chempıonatynda 20 jasynda top jarǵan bolatyn. Sonymen qatar Sanjardyń osydan eki jyl buryn jastar arasyndaǵy jahandyq dodada úzdik shyqqanyn jankúıer umyta qoıǵan joq. Sporttyq karerasyn asa iri jetistikpen bastaǵan Táshkenbaı aldaǵy jarystarda da tuǵyr bıiginen túspeıdi degen senimdemiz.
Sanjardyń izin ala sharshy alańǵa 67 kıloda Dýlat Bekbaýov shyqty. Fınalǵa deıin táp-táýir judyryqtasyp, jankúıerdiń kózaıymyna aınalǵan Dýlat altyn júlde úshin ótken aıqasta jarys qojaıynyna jol berdi. Irikteý saıystarynda Rýmynııa, Úndistan, Meksıka, Grýzııadan kelgen qarsylastaryn 5:0 esebimen tize búktirip kelgen Dýlat fınalda dál sondaı eseppen Asadhýja Mýıdınhýjaevtan jeńilip qaldy. Nətıjesinde, eki jyl burynǵy Serbııadaǵy álem chempıonatynda úshinshi aınalymda súringen Asadhýja Mýıdınhýjaev óz elinde chempıon atandy. Al Dýlat Bekbaýov kúmis medaldi moınyna ildi.
Keshegi fınal jekpe-jekteri qazaq boksshylarynyń benefısine aınaldy. 21 jasynda ekinshi ret álem chempıonatynyń fınalyna shyqqan Mahmud Sabyrhan (54 kg) aldyńǵy, Belgradtaǵy álem chempıonatyndaǵy qateligin qaıtalaǵan joq. Bul joly fınalda ol ózbekstandyq Oıbek Djýraevqa múmkindik bermeı, boksty tamashalaýǵa jınalǵan dúıim jurt qazaq boksshysynyń sheberligine tánti boldy. Tipti, jerlesimiz úshinshi raýndta ózbek boksshysyn eseńgiretip, tóreshi eki ret esep ashty!
71 kılo salmaq dárejesinde sharshy alańda jarys jolyna shyqqan ulttyq qurama kapıtany Aslanbek Shymbergenov mańyzdy jeńiske qol jetkizdi. Ol ózbekstandyq Saıdjámshıd Jafarovpen kezdesýde biraýyzdan jeńiske jetti. Osylaısha, fınaldaǵy Qazaqstan – О́zbekstan teketiresinde Aslanbek ulttyq qurama komandasyn alǵa shyǵardy. Esep – 2:1.
Tórtinshi altyn 80 kıloǵa deıingi salmaqtaǵy Nurbek Oralbaıǵa buıyrdy. Ol qytaılyq qandasymyz Toqtarbek Tańatqanmen jolyqty. Otandasymyz óziniń basymdyǵyn tanytyp, chempıon atandy. Sóıtip, el quramasy álem chempıonatyn tórt altyn, bir kúmis medalmen aıaqtady. Jalpy komandalyq esepte ekinshi orynǵa ıe boldy.
Keshegi kún qazaq boksynyń asqaqtaǵan chempıonaty boldy. О́zbekstandyq baýyrymyz Rýslan Abdýllaev (63,5 kg) altyn alsa, qytaılyq qandasymyz Toqtarbek Tańatqan (80 kg) kúmis júldege ıe boldy. Aıtpaqshy, bokstan álem chempıonaty tarıhynda tuńǵysh ret eki qazaq oǵlany jeńis tuǵyrynda qatar turdy. 80 kılo salmaqta judyryqtasqan Nurbek Oralbaı men qytaılyq qandasymyz Toqtarbek Tańatqannyń bireýi altyn, bireýi kúmis alǵan sát áli talaı áńgimeniń arqaýy bolatyny sózsiz.
Bir baıqaǵanymyz marapattaý rásimine boksshylarymyz ulttyq taqııamyzdy kıip shyqty. Qazaq jankúıerleri Ánuranymyzdy erekshe daýyspen shyrqap, «HUMO-Arena» stadıonyn jańǵyrtqany da kóńilimizge qýanysh syılady.
«Qazaq boks mektebiniń dańqty dástúrleri birte-birte shaıylyp bara jatqandaı kúı keship júrgenimiz jasyryp-jabýǵa da kelmeı, jyldan jylǵa janymyz jabyrqap júrgende Tashkenttegi tamasha tabys (fınalǵa shyqqan bes jigitimizdiń tórteýi altynnan alqa taqqany naǵyz jarqyn jeńis!) ulttyq rýhymyzdy da bir silkintip salaryna sengimiz keledi», deıdi fınaldyq jekpe-jekterdi О́zbekstan tórinde otyryp tamashalaǵan tanymal qalamger Saýytbek Abdrahmanov. Bul oıdy osy kúnderde belgili jazýshy Raqmetolla Raıymqulovtyń 110 jyldyǵyn ataýǵa Tashkentke kelgen Prezıdent keńesshisi Málik Otarbaev, aqyn-jazýshylar Qulbek Ergóbek, Ǵalym Jaılybaı, Nurǵalı Oraz da qýattady. Aqyn Ǵalym Jaılybaı taban astynda myna shýmaqty aıtyp ta tastapty:
Baqyt shamyn jaǵaıyn,
Ǵajap, ǵajap, ǵajap kún!
Qutty bolsyn, aǵaıyn,
Tórt altyny Qazaqtyń!
Álem chempıonatynan keıin Qazaqstan boks federasııasynyń prezıdenti Keńes Raqyshev ile-shala jýrnalısterge bergen suhbat beripti: «Kelesi kezdesý elimizde ótedi, onda bizdiń chempıondarymyz, júldegerlerimiz, Myrzaǵalı Aıtjanovtyń jattyqtyrýshylar quramy jáne keshendi ǵylymı top Federasııa basshysynan laıyqty syıaqysyn alady», dedi ol.
