Eń bastysy – el birligi

Baıyptap qaraǵanda, bul sózde úlken mán-maǵyna jatyr. О́ıtkeni qoǵamdaǵy ár azamat, etnostyq top ótken tarıhyn ózi ómir súrip jatqan eldiń tutas tarı­hynyń bir quramdas bóligi retinde sanaǵanda ǵana ózderin halyqtyń bir múshesi retinde sezinip, búgini men keleshek taǵdyryn táýelsiz Qazaqstanmen baılanystyratyny anyq. Bul rette, Uly dalada ǵun, saq dáýiri, Túrki qaǵanattary, Altyn Orda, Qazaq handyǵy sııaqty tek túrki tektes rý-taıpalardy ǵana emes, Eýrazııa qurlyǵyndaǵy ulttar men etnos ókilderi músheleriniń basyn biriktirgen, sol arqyly tarıhı taǵ­dyr talaıy men ortaq mádenıeti bar el bolyp qalyptasqandyǵyn eskerý kerek. Memleket basshysy sessııada «Assam­bleıanyń barlyq negizgi jumysy jergilikti jerde, ıaǵnı halyq arasynda júrgizilýge tıis» dep, «tomaǵa-tuıyq tir­shilik etetin etnıkalyq aýdandar men kvar­taldardyń paıda bolýyna jol ber­meý­di» tapsyrdy. Osy maqsatta el­degi turyp jatqan túrli jekelegen et­nostyq toptardyń ótkenin Qa­zaq­­stan mem­leketiniń tarıhymen tyǵyz baılanys­­tyra otyryp, keshendi sharalar ázirleý, jumys josparlaryn jasaý, bilikti tarıhshy-mamandar tarapynan ǵylymı jobalar uıymdastyrý asa mańyzdy.

Memleket basshysy aıtqandaı, bul ju­mystardyń barlyǵy ǵylymı tujy­rym­­darǵa negizdelýi qajet. Osy rette aıta ketken jón, 2018 jyly Prezıdent Ákim­shiligi ishki saıasat bóliminiń meń­ge­rý­shisi Aıda Balaevanyń tapsyrmasymen «Týǵan jer» jáne «Rýhanı jańǵyrý» baǵdarlamasy konteksinde Alash ıdeasy men «Máńgilik el» qundylyktary: tarıhı tájirıbesi, sabaqtastyǵy jáne bolashaǵy» atty baǵdarlamalyq-nysandy qarjylandyrý arqyly ǵylymı jobany iske asyrǵan edik. Jobanyń ǵylymı nátı­jeleri: «Rýhanı jańǵyrý: «Máńgilik el» qundylyqtary jáne «Alash ıdeıasy» atty oqý-ádistemelik quraly men hrestomatııasy ázirlendi. Olardyń elektrondy nusqalary respýblıkanyń barlyq oblysynyń ishki saıasat basqarmalary arqyly etno-mádenı birlestikterde qoldanysqa engizilip, oń baǵa berildi.  Sessııada Memleket basshysy sońǵy kezdegi janjaldar negizinen aýyldyq jerde bolatyndyǵyn, sondyqtan shalǵaı aýyldardyń turǵyndary arasynda bel­sendi aqparattyq jumys júrgizý qajet­tigin, onyń ózinde ásirese, bir etnos ókilderi shoǵyrlana qonystanǵan aýdan­dar­ǵa tikeleı qatysty ekendigin atap ótti.

Atalǵan aýdandardaǵy etnostyq top­tar­dyń ótken tarıhyn Qazaqstan mem­le­keti tarıhymen tyǵyz baılanys­tyryp, nasıhattaý jáne oqytý tek etno-mádenı birlestikterde ǵana emes, mektep, gımnazııa, kolledj qabyrǵasynan bastalǵany mańyzdy. О́ıtkeni etnostyq toptardyń el taǵdyrymen bir­tutastyǵy týraly tarıhı sana azamattarda jas kezinen ornyqtyrý Ádiletti Qazaqstandaǵy el birligi men onyń alǵa qaraı damýyna óz úlesin qosady degen senimdemiz.

Sataı SYZDYQOV,

UǴA qurmetti akademıgi