Sybaılas jemqorlyqqa qarsy is-qımyl agenttigi bul baǵytta tegeýrindi jumys júrgizip jatyr. Buǵan sońǵy kúnderi bolǵan jańalyqtar arqyly kóz jetkizýge bolady. Agenttik osy aptada «Azamattarǵa arnalǵan úkimet» memlekettik korporasııasy» KEAQ Astana qalasy boıynsha mamandandyrylǵan bóliminiń qyzmetkerleri men azamattyq tulǵalardan uıymdastyrylǵan topqa qatysty sotqa deıingi tergep-tekserýdi aıaqtady.
Qylmystyq is «Web-Modýl» jáne «IIS SON» aqparattyq júıelerinde kólik quraldary týraly málimetterdi zańsyz engizý jáne joıý, mámilelerdiń jazbasha nysandaryn qoldan jasaý faktileri boıynsha tergeldi. Qylmystyq toptyń 2022 jyldyń qańtar-mamyr aılary aralyǵynda zańnamada qarastyrylǵan alymdar men tólemderdi jasamaı-aq shetelden ákelingen 475 avtokólikti zańsyz tirkegeni belgili bolǵan. Osyǵan baılanysty memleketke 1,4 mlrd teńge kóleminde asa iri kólemde zalal keltirildi. Jalpy sany 30 adamǵa qylmys jasady dep aıyp taǵylyp otyr. Olardyń qatarynda Astana qalasy boıynsha №2 Arnaıy Halyqqa qyzmet kórsetý ortalyǵynyń basshysy, 4 polısııa qyzmetkeri men avtokólikterdi zańsyz rásimdeý boıynsha óz qyzmetterin usynǵan deldaldar bar. Qazirgi ýaqytta qylmystyq is materıaldarymen tanysý júrip jatyr. Osy oryn alǵan jaǵdaılarǵa baılanysty Sybaılas jemqorlyqqa qarsy kúres qyzmeti azamattardy kólikterdi tirkeý kezinde deldaldardyń qyzmetine júginbeýge shaqyrady.
Ejelgi skıf oıshyly Anaharıs aıtqan «Zań degenimiz – órmekshiniń tory: kishkentaı jándikter tutylady da, irileri buzyp-jaryp shyǵady» degen zaman qazir ótip barady. Jańa Qazaqstanda mundaı zańǵa oryn joq. Budan bylaı sybaılas jemqorlyq jasaý qylmystary boıynsha tek maıda shabaqtar emes, úlken «oıynshylar» da laıyqty jazasyn alatyn bolady. Bir sózben aıtqanda, jemqorlyqqa «qamqorlyq» bolmaıdy.
Sonyń bir dáleli – 10 mamyrda antıkor «Atameken» ulttyq kásipkerler palatasy basqarmasynyń eks-tóraǵasy A.Myrzahmetovti ustady. Oǵan alaıaqtyq jáne kásipkerdi onyń týysyn qylmystyq jaýapkershilikten bosatýǵa járdemdeskeni úshin asa iri kólemde para berýge ıtermeledi degen aıyp taǵylyp otyr. Qazir kúdikti Astana qalasy PD ýaqytsha ustaý oqshaýlaǵyshyna qamaldy. Qylmystyq is boıynsha jedel-tergeý is-sharalar kesheni júrgizilip, onyń basqa da qylmystarǵa qatysy týraly aqparat tekserilip jatyr.
«Al keshe Sybaılas jemqorlyqqa qarsy is-qımyl agenttigi Astana qalasy qorshaǵan ortany qorǵaý jáne tabıǵatty paıdalaný basqarmasynyń basshysy Álııa Qojabaevanyń ustalǵanyn málimdedi. «Sotqa deıingi tergeý bastalǵanyn rastaımyz. Tergeý sharalary jalǵasyp jatyr. QR QPK-niń 201-babyna sáıkes ózge aqparat taratýǵa jatpaıdy», dep habarlady Antıkor.
Álııa Qojabaeva 1977 jyly Kókshetaýda dúnıege kelgen. Sh.Ýálıhanov atyndaǵy Kókshetaý memlekettik ýnıversıtetin, «Femıda» Qaraǵandy zań akademııasyn, Prezıdent janyndaǵy Memlekettik basqarý akademııasyn bitirgen. Eńbek jolyn 2002 jyly bastaǵan ol sońǵy qyzmetti 2020 jyldyń aqpan aıynan beri atqaryp keledi. Oǵan deıin Aqmola oblysy kásipkerlik jáne ónerkásip basqarmasynyń bastyǵy, Astana qalasy kásipkerlik jáne ónerkásip, Qoǵamdyq damý jáne Qorshaǵan ortany qorǵaý jáne tabıǵatty paıdalaný basqarmalary bastyǵynyń orynbasary syndy laýazymdy qyzmetterdi atqarǵan.
Eske sala ketsek, Konstıtýsııanyń 77-baby 3-tarmaǵynyń 1-tarmaqshasyna jáne Qylmystyq-prosestik kodekstiń 19-baby 1-bóligine sáıkes, qylmystyq quqyq buzýshylyq jasaǵany sot úkimimen naqty belgilengenge deıin adam kinásiz dep esepteledi. Sonymen qatar, sybaılas jemqorlyqtyń kez kelgen faktileri týraly Antıkorrýpsııalyq qyzmetke jáne Call-ortalyqqa 1424 nómiri boıynsha habarlasýǵa bolatynyn eske salamyz.
