«Elorda jastary» - qala ákimdigi men Otbasy banktiń («Báıterek» holdınginiń enshiles uıymy) birlesken jobasy.
Baǵdarlama jeńildikpen nesıe alýǵa múmkindik beredi. Oǵan jas muǵalimder, dárigerler, jýrnalıster, mádenıet salasynyń qyzmetkerleri, sportshylar, JOO ustazdary men ǵylymı qyzmetkerler, áleýmettik sala men kommýnaldyq qyzmet qyzmetkerleri, Polısııa departamenti men Tótenshe jaǵdaılar departamenti qyzmetkerleri, sondaı-aq Astana qalasy boıynsha turǵyn úı kezeginde turǵan jetim balalar qatysa alady.
Qaryz alýshylardyń jasy 35-ten aspaýy tıis.
Atalǵan baǵdarlamany júzege asyrýǵa Astana qalasy ákimdigi 1,5 mlrd teńge, Otbasy bank 1,5 mlrd teńge bólip otyr. Bul qarajatqa 200-ge jýyq turǵyn baspanaly bolady dep kútiledi.
Áleýetti qaryz alýshylardyń tizimin jergilikti atqarýshy bılik qalyptastyrady.
О́tinishter qatysu.zhilfond.kz saıtynda 2023 jyldyń 30 mamyry saǵat 9:00 bastap, 6 maýsym saǵat 23:59 deıin qabyldanady. Avtorızasııadan ótý úshin elektrondy sıfrlyq qoltańba qajet.
О́tinimderdi qabyldaý merzimi aıaqtalǵan soń qatysýshylardy irikteý bastalady. Úmitkerler pýly baldyq júıe boıynsha qalyptasady, onda - eńbek ótili, ótinish berýshiniń 1, 2, 3-inshi múgedektik tobyna jatatyn-jatpaıtynyn (erli-zaıyptynyń nemese balalarynyń biri) eskeriledi.
Pýl qurylǵannan keıin onyń qatysýshylary Otbasy bankinen nesıe alýǵa joldama alady.
Bank baǵdarlama qatysýshysynyń tólem qabilettiligin tekserip, jyldyq 5 paıyzben (JTSM 5,2% bastap) jeńildetilgen nesıe beredi. Alǵashqy jarna – 10%. Elordalyq jas turǵyndarǵa beriletin nesıeniń eń joǵary somasy – 18 mln teńge, merzimi – 25 jylǵa deıin. Onyń kómegimen bastapqy nemese qaıtalama naryqtan, sondaı-aq «Qazaqstan turǵyn úı kompanııasy» AQ-nyń kepildemesimen úlestik qatysý sharty boıynsha salynyp jatqan úıden baspana satyp alýǵa bolady.
