Ol aldymen Beıimbet Maılınmen birge Troıskidegi «Ýazıfa» medresesinde bilim alǵan, keıin Sábıt Muqanovpen birge Ombyda alashordalyqtar ashqan muǵalimder kýrsynda Maǵjannyń dáristerin de tyńdaǵan. Keńes ókimeti ornaǵan jyldarda Orynborda shyǵyp turǵan «Ushqyn», keıin «Eńbekshi qazaq» atanǵan qazirgi «Egemen Qazaqstan» gazetinde Sáken, Smaǵul basshy bolǵan jyldarda qyzmet atqarǵan. «Egemenniń» 90 jyldyǵyna shyqqan «Jádiger» atty jınaqta «Olar osynda eńbek etken» degen taqyryppen gazette istegen jandardyń sol kezge deıingi tolyq tizimi berilgen. Sonda Ábdirahman Aısarınniń esimi tegi «A» árpinen bastalatyndardyń arasynda tur.
Ábdirahmannyń alashordashylardy jaqtaǵan isteri belgili bolǵanda onyń izine sham alyp túsýshiler tabylyp, aqyry ol ortalyqtan týǵan eli Qyzyljarǵa aýysýǵa májbúr bolady. Munda ol oblystyq «Bostandyq týy» gazetinde jumys istedi. Alaıda ortalyqtaǵy dúmpýdi estigen sholaq belsendiler qyzyl qyrǵyn jyldarynda oǵan kún kórsetpeı, 1937 jyldyń tamyz aıynda ustatady. Esil erdi Almatyǵa áketip, 1938 jyly Talǵar túbindegi Dıqanbaı degen qystaýdyń mańynda basqa da «halyq jaýy» atanǵan jazyqsyz jandarmen birge atqan.
Sodan Á.Aısarınniń jarqyn esimi týǵan halqyna tek 1959 jyly, aqtalǵannan keıin ǵana oralady. Alaıda jazǵan-syzǵan dúnıeleriniń bárin NKVD qurtyp jibergeni anyqtalady. 1967 jyly Sábıt Muqanov Soltústik Qazaqstan oblystyq «Lenın týy» gazetinde «Ábdirahman Aısarın» degen estelik jarııalap, ony halyqqa otyz jyldan keıin jete tanystyrady.
«Ábdirahman menimen bir ákimshilik bolystyń ishinde týdy. Bala kezimizden birge ósip, bite qaınaǵan, jańa dáýirdiń tańy atqan shaqta, áleýmettik, partııalyq qyzmet maıdanyna aýyldan birge attanǵan, jeke jáne qoǵamdyq turmysta shyn kóńilden senisken jandaı joldasym edi ol», dep jazypty Sábeń.
Ábdirahman Aısarın týraly maqalalar jazyp, onyń esimin oblys jáne respýblıka turǵyndaryna tanystyryp ketkenderdiń qatarynda jergilikti aqyn, jýrnalıst Zeınolla Ákimjanov boldy. Ol Ábdirahmannyń áıeli Mádınanyń ekinshi kúıeýi Ramazannan týǵan. Sondyqtan anasy Mádınadan Á.Aısarın týraly kóp shyndyqty estip óskeni anyq. Mádına apamyzdyń ózi de «halyq jaýynyń» áıeli retinde 5 jyl boıy «ALJIR»-de azap shekken. Ol kúıeýi aqtalǵan 1959 jyldan keıin ǵana Ábdirahman týraly aıta bastaǵan. Zekeń marqum bylaı dep eske alady: «Keıin anam syrdy tam-tumdap aqtara bastady. Sondyqtan men odan surap, Ábdirahmanmen kezdesken adamdardyń áńgimelerinen uqqan jaılardy oqyrmandarǵa baıandaýdy uıǵardym».
Ábdirahman men Mádınanyń kindiginen Aına, Aıan, Aıman, Azııa esimdi balalar bolǵan. S.Muqanov atyndaǵy kitaphanada bolǵan kezdesýde solardyń urpaqtary kelip, estelikter aıtty. Sonyń ishinde inisiniń kelini Orynbasar Kósherova, shóberesi Indıra Baımuhambet, t.b. boldy.
PETROPAVL
