О́zderin «Antares» atty halyqaralyq fırma fılıalynyń ókilderimiz dep tanystyrǵan alaıaqtar bar jıǵan-tergenin ózderine senip tapsyrǵan turǵyndarǵa aqshańyzdy kúnine eki paıyzdyq ósimpulmen qaıtaryp beremiz dep ýáde etip, sońynda taqyrǵa otyrǵyzyp ketken. Pıramıdaǵa qatysýshylardyń ishinde 100 myń dollardan 300 myń dollarǵa deıin salym salǵandar bar. Aıyptaýshy taraptyń málimetinshe, Qostanaı qalasynyń turǵyndary Olga Tropanes, Gúlshat Jetpisbaeva jáne Shyńǵys Kemelbaev ashqan jalǵan fırmaǵa elimizdiń birneshe óńirinde turatyn 97 azamat aqsha aýdarǵan. Alaıaqtardyń esepshotyna túsken qarjynyń kólemi 49 mln teńgeden asyp jyǵylady.
Jábirlenýshilerdiń ishinde alaıaqtardyń kesirinen páterin joǵaltqandar, talaı jyl boıy tirnektep jıǵan qomaqty qarjysynan aıyrylǵan zeınetkerler bar. Tipti bankten nesıege aqsha ala salyp, onysyn taban astynda «Antareske» sanap bergender de kezdesedi. Máselen, páterin satqan jábirlenýshiniń biri 6 mln teńge kólemindegi aqshasyn túıinshekke oraýly kúıinde Gúlshat Jetpisbaeva men Shyńǵys Kemelbaevtyń qolyna ustatqan. Munyń syrtynda, bul ańǵal áıeldiń qyzy alaıaqtardyń esepshotyna 2 mln teńge taǵy aýdarypty. Sondaı-aq, O.Aleksanova esimdi azamat qarjy pıramıdasyna 3 myń 150 dollar salǵanyn aıtady. Jalǵyz ózi jeti bala tárbıelep ósirgen zeınetker A.Muqanova da úıiniń shatyryn bútindeý úshin nesıege alǵan 500 myń teńgesinen aıyrylypty.
– Men ol aqshany termınal arqyly G.Jetpisbaeva aıtqan adamnyń esepshotyna aýdardym. Endi shatyr da joq, aqsha da joq, bostan-bosqa nesıe tólep otyrmyn. Mundaı bolaryn kim bilgen? – dep kúrsinedi sharasyz zeınetker.
Alaıaqtarǵa 440 myń teńgesin ustatqan I.Aleksanov pen 6 mln teńgesin bergen S.Bedertdınova da aqshalaryn qaıtara almaǵan. Tanymaıtyn, bilmeıtin adamǵa eshkim qomaqty aqshasyn ustata salmaıtyny belgili. Alaıda jábirlenýshilerdiń aıtýynsha, qarjy pıramıdasyn uıymdastyrǵandar ózderi burynnan jaqsy biletin, otbasynda bolatyn ár túrli qýanysh-toılarda jıi dámdes bolyp júrgen tanys adamdar. Alaıaqtar óz qurbanynyń ábden ishi-baýyryna kirip alǵan soń, tabysy joǵary senimdi depozıt ashtyq dep aldap, aqyry taqyrǵa otyrǵyzyp ketip otyrǵan.
– Mádına aldyńǵy jyly úı satyp jatqanymdy estip, jańa depozıt ashyldy, oǵan men jaýaptymyn. Eshqandaı pıramıda emes, salǵan aqshańyzdy eki aıdan keıin 50 paıyzdyq ósimmen qaıtyp sheship alasyz dep kún saıyn mazalaı bastady. Qyr sońymnan qalmaı qoıǵan soń, «Lısenzııasy bar ma?» dep suradym. «Búkil qaǵazdary zańdy túrde tirkelgen. Qazir aqshanyń bárin men jınaımyn. О́zim aralasatyn qaltaly azamattardyń áıelderi qazir bizge depozıt salyp, úlken paıda taýyp jatyr. Alena degen kelinim de 50 myń dollar salyp, 100 myń dollar aldy. Tanystarymnyń kóbi ekinshi ret salym salyp jatyr» dedi. Aqyry 4 mln teńge aqshamdy Mádına aıtqan adamnyń esepshotyna aýdardym. Byltyr oıda-joqta 6 shildeniń keshinde Mádına habarlasyp, depozıttiń jabylyp qalǵanyn aıtty. Men aqshamdy qaıtaryp berýdi talap etip edim, «qazir demalystamyn, ornymdaǵy Gúlshat Jetpisbaevaǵa habarlas» dedi. Al Gúlshat «3-4 mln teńgege bola bet jyrtyspaıyq, eshqaıda shaǵymdanbaı-aq qoıyńyz» dep renish bildirdi. Bos áńgimeden eshteme shyqpaıtynyna kózim jetken soń, quqyq qorǵaý oryndaryna qońyraý shalýǵa týra keldi, – deıdi qomaqty qarajatynan aıyrylǵan jábirlenýshiniń biri.
Gúlshat Jetpisbaeva men Shyńǵys Kemelbaev tergeý barysyna kómekteskenderi úshin kýágerler sanatyna aýystyrylypty. Al Olga Tropanestiń kinásin memlekettik aıyptaýshylar tolyq dáleldep shyqqan. Sońǵy sot otyrysynda aqyrǵy sózin aıtqan kúdikti: «Tergeý barysynda jaýap alynǵan árbir adamnyń atalmysh qarjy pıramıdasyna qanshalyqty qatysy bar bolsa, meniń de oǵan qatysym sonshalyqty ǵana. Eger men «Antares» kompanııasyn qurýǵa qatysyp, salymshylardyń aqshasyn jymqyrǵan adam bolsam, qazir Aleks Rıhtermen birge saırandap shetelde júrer edim. Qostanaıda «Antarestiń» keńsesi ashylǵany ras. Biraq ony ashqan – men emes, Gúlshat Jetpisbaeva. Ol óz basyn jazadan arashalap alý úshin sotqa jalǵan aıǵaq berip otyr» dedi.
O.Tropanestiń Aleks Rıhter dep otyrǵany 10 jyldan beri Domınıkanda turyp jatqan Aleksandr Jırovkın degen alaıaq bolyp shyqty. Sottan ózin jábirlenýshi retinde tanýdy suraǵan Olga Tropanes tergeý budan ári jalǵasatyn bolsa, qarjy pıramıdasyn shyn uıymdastyrýshylardyń kim ekenin anyqtap, istiń anyq-qanyǵyna jetýge barynsha kómektesetinin aıtty. Tańerteń bastalǵan sot otyrysy uzaqqa sozylyp ketkeni sonshalyq, sot tóraǵasy úkimdi keshke bir-aq oqydy.
– Sizdiń atalǵan qylmysqa qatysym joq degen ýájińizdi rastaıtyn naqty dálelder joq. Alaıda ózińizge taǵaıyndalǵan jazany jeńildetetin jaǵdaılar, ıaǵnı kámelet jasqa tolmaǵan úsh balańyz ben aıaǵyńyzdyń aýyr ekeni eskeriletin bolady, – dedi sot tóraǵasy Mereı Amanjolov.
Qylmystyq kodeks boıynsha qarjylyq pıramıdaǵa jetekshilik etkender 5 jyldan 10 jylǵa deıin bas bostandyǵynan aıyrý jazasyna kesiledi. Sot Olga Tropanesti 6 jyl merzimge bas bostandyǵynan aıyrý týraly úkim shyǵardy. Biraq úsh kishkentaıy men aıaǵynyń aýyrlyǵy eskerilip, jaza merziminiń bir jyly qysqartyldy. Osylaısha, sottalýshy ómiriniń 5 jylyn bala-shaǵasynan shette, temir tordyń arǵy betindegi qapasta ótkizetin bolady. Sot barysynda jábirlenýshilerdiń de talaptary qanaǵattandyrylǵan sııaqty. О́ıtkeni olar aıyrylyp qalǵan 49 mln teńgeni qaıtaryp berýge sottalǵan O.Tropanes qana emes, sonymen birge kýáger sanatyna ótken G.Jetpisbaeva men Sh.Kemelbaeva da mindetti bolady.
Qostanaı oblysy
