Almaty qalasy Din isteri jónindegi basqarmasynyń qoldaýymen «Adam jáne qoǵam» úkimettik emes uıymynyń uıymdastyrýymen dinı ekstremızm men terrorızmniń aldyn alý maqsatynda bilikti teologtar, dintanýshylar, sarapshylar, psıholog jáne fılosoftardyń qatysýymen Almaty qalasynyń 100-ge jýyq jalpy bilim berý mekemeleri men kolledjder muǵalimderine arnalǵan 12 saǵattyq semınar ótti.
Din salasyndaǵy keleńsizdikterdiń aldyn alýda dinı saýatsyzdyqqa jol bermeý, dástúrli dinı túsinikti jastar boıynda qalyptastyrý – memlekettik qaýipsizdiktiń aldyn alýda erekshe nazar aýdaratyn másele. Osy oraıda semınar barysynda mamandar tarapynan destrýktıvti dinı aǵym ıdeologııasynyń qoǵamǵa qaýpi jáne oǵan qarsy qoldanylatyn dálelder men ádis-tásilder, zaıyrlylyq túsinigi, ǵalamtor keńistiginde kúmándi dinı aqparattardyń taralýyn boldyrmaý jáne oǵan qarsy tıimdi nasıhattyq jumystardy júrgizý ádisterimen qatar din salasyna qatysty aqparattar berildi.
Almaty qalasy Din isteri jónindegi basqarmasy basshysynyń orynbasary Erǵalı Kósheke atap ótkendeı, búginde din salasyndaǵy memlekettik saıasattyń negizgi baǵyttarynyń biri dinı ekstremızm ıdeologııasynyń taralýynyń aldyn alý, dástúrli emes dinı ıdeologııanyń taralýyna qarsy nasıhat jumystaryn júrgizý mańyzdy. Dinı ekstremızm ıdeologııasynyń taralýyna qarsy kúreste jalpy bilim berý mekemeleri men kolledjderdiń muǵalimderi osy semınardan orasan tájirıbe alyp, jumystarynda tıimdi paıdalana alady.
Semınar oqytýshysy, «Nur-Múbárak» Mysyr ıslam mádenıeti ýnıversıteti Dinı ekstremızmge qarsy is-qımyl ortalyǵynyń dırektory Tımýr Núsiphanuly qatysýshylarǵa destrýktıvti dinı aǵymdardyń erekshelikteri, ekstremıstik jáne terrorıstik uıymdarǵa tartýdyń psıhologııalyq ádisteri, sondaı-aq qoǵamdyq qaýipsizdikti saqtaý men memlekettiń órkendeýi úshin konfessııaaralyq kelisimniń mańyzdylyǵy týraly aıtty.
Semınarda mamandar qatysýshylar suraqtaryna jaýap berip, arnaıy sertıfıkattar tabys etildi.
ALMATY
