Túrkitildes 37 elge taraıtyn halyqaralyq jýrnaldy Túrkııadaǵy Eýrazııalyq jazýshylar odaǵy (tóraǵasy Iаkýb О́meroǵly)shyǵarady. Aıyna bir ret oqyrmanǵa jol tartatyn basylymnyń ataýy qazaq tilinde «Baýyrlas qalamdar» degen uǵymdy beredi.
Tobyl tórindegi Alash qaıratkeri Seıdázim Qadyrbaıulyna arnalǵan halyqaralyq ǵylymı konferensııaǵa kelgen Túrkııa ǵalymdarynyń aıtýynsha, «Kardeş Kalemler» ádebı-pýblısıstıkalyq jýrnalynda elýden astam memlekettiń ǵalym-qalamgerleriniń maqalalary, óleńderi men prozalyq shyǵarmalary jarııalanyp turady. Keıde shyǵarýshylar jýrnaldyń bútindeı bir sanyn basynan aıaǵyna deıin túrki áleminiń asa kórnekti tulǵalaryna arnaıdy.
– Mysaly, byltyr Ahmet Baıtursynulynyń 150 jyldyǵyna oraı bul jýrnaldyń qyrkúıektegi sany tolyqtaı Aqańa arnaldy. Ult ustazyn zertteýshilerdiń eńbekterin jınap, baspaǵa daıyndaǵan professor Nergız Bıraı. Bárimiz bir-bir maqaladan qosyp, sol jaqta Ahmet atamyzdyń murasyn barynsha nasıhattaýǵa úles qostyq. Ol jýrnaldyń tusaýkeseri Qazaqstan Respýblıkasynyń Túrkııadaǵy elshiliginde uıymdastyryldy. Bıyl jýrnaldyń bir sany Alash qaıratkeri Seıdázim Qadyrbaıulyna arnalyp otyr. Shyndyǵynda, Seıdázim atamyzdy shetel turmaq, Qazaqstannyń ózinde kóp adam bile bermeıdi. Sondyqtan bastan-aıaq kópshilikke jyldar boıy beımálim bolyp kelgen Alash ardaqtysynyń ómirbaıany, tulǵasy, elge etken eńbegine arnadyq. Mundaǵy maqsatymyz – qaıratkerdi Túrkııadaǵy halyqqa tanystyrý jáne túrikshe biletin jurtshylyq arqyly álemge tanytý, – deıdi PhD, Ankara qajy Baıram Ýálı ýnıversıtetiniń tarıh professory Gúljanat Qurmanǵalıeva-Erdjılasýn.
«Kardeş Kalemler» jýrnalynyń bútindeı bir sany 2020 jyly qazaqtyń bas aqyny Abaıdyń 175 jyldyǵyna arnalǵany málim.
Qostanaı oblysy
