Shoqan mýzeıi qaıta jańǵyrady

Biz atal­­ǵan mýzeıdiń ja­ıyna­ byltyr úńilip, jóndeý ju­­mystaryn kútip turǵanyn jazǵanbyz. Jetisý oblysynyń bıýdjeti bıyl ǵana bekidi. Endi qurylys jumystaryna respýblıkalyq bıýdjetten 338 mln teńge qa­ras­­tyrylǵan. Kerbulaq aýda­nyna jumys saparymen bar­ǵan óńir basshysy Beıbit Isabaev turǵyndar men mýzeı­ qyzmetkerlerine ǵalymnyń ǵı­maraty qaıta túleıtinin aıtyp, aqjarma jańalyqpen bólisti. Sondaı-aq osy nysandardaǵy jón­deý jumystarynyń qalaı júrgiziletini jónindegi má­se­­leni merdiger mekeme ókil­derimen talqylady

Kópke aıan, qansha jyl ótse de qazaqtyń aıaýly perzentine degen eldiń qurmeti azaıǵan emes. Ejelgi dáýirmen enshiles eńbekterin tereń tanı túsýge degen qulshynys qoǵamda artpasa, kemigen joq. Byltyr el Prezıdenti Jetisý oblysyna kelgen saparynda «Biz Shoqandy álemdik deńgeıde dáripteýimiz kerek» dep, ulylar jatqan tarıhı oryndardy urpaqqa únemi tanys­tyrý kerektigin aıtqany kóptiń nazaryn shoqantanýǵa qaıta bir márte aýdardy deýge bolady. Sodan beri memorıaldy mýzeıde qarbalas tirshilik bastalyp, murajaı janyndaǵy ǵylymı-mádenı ortalyqty jóndeý ju­mys­tary qolǵa alynǵan.

Iá, 90-jyldardyń to­qy­­­ra­ýynda qaraýsyz qalǵan ǵı­ma­rat ábden tozyp, qıraýdyń aldynda turdy. Oǵan deıin Sh.Ýálıhanov eńbegin zerdeleýge kelgen ǵalymdardyń ornalasýy­na múmkindik beretin qonaqúı, konferensııa zaly, ashanasy jumys istegen ny­sanǵa qaıtadan kóńil bóline bastaǵanyna aýyl turǵyndary dán rıza.

Kerbulaq aýdanynda aldymen Shoqan jerlengen jerge toqtap, ǵalymnyń rýhyna Quran baǵyshtaǵan oblys basshysy osy orynnyń mańaıyn, qorshaýyn retke keltirý men mýzeıdiń jóndelý jaıy, es­kert­kish restavrasııasynyń qalaı júrgiziletini týraly «Qazrestavrasııa» RMK ma­man­­darmen egjeı-tegjeıli tal­qylady. Aǵartýshy ǵalym­nyń músinin restavrasııalaýda burynǵy qalpy saqtalatyn bola­­dy jáne eskertkish temir ilgek­termen myqty etip otyr­­­ǵyzylady. Tas músinniń mańaıy da jańǵyrtylady. Osy oraıda oblys basshysy eskertkish aınalasyna burynnan tóselgen, áli kúnge syny ketpegen qymbat ári tózimdi materıaldardy buzǵannan góri, solardyń ózin tazalap, óńdep retke keltirý jaǵyn da qarastyrý kerektigin eskertti.

Mýzeıdiń ishin de zaman talabyna saı jańǵyrtý qajet. Osy oraıda sensorly led ekran qoıý múmkindigi qarastyrylyp, kartınalardy taqyryptyq úılesimde retke keltirý, jádi­gerlerdi saqtaýdyń barlyq qa­jettilikterin qamtý da oılastyrylady. Qazir mýzeıdiń shaǵyn kınozaly májilis ótkiziletin oryn retinde paıdalanylyp otyr. Oblys basshysy bul zaldy ári kınozal, ári májilis zaly retinde qatar qoldana alatyndaı etip jasaqtaý qajettigin aıtty. О́ıtkeni týrısterge Shoqannyń ómiri men eńbegi týraly beınefılmder kórsetýdiń de mańyzy zor. Beıbit Isabaev ásirese mýzeıdiń jylý júıesin retke keltirýge basa nazar aýdarýdy tapsyrdy. Mýzeı dırektorynyń aıtýynsha, nysan ishinde qysta temperatýra +12 gradýstan aspaıdy.

«Shoqan mýzeıi – ári tarı­hı muramyz, ári týrıstik jaǵynan tartymdy nysan. Jóndeý jumystary júrgiziletin bol­ǵandyqtan, bul keshendi jan-jaqty jańǵyrtýǵa kúsh salýy­myz kerek. Qysta mýzeıdiń ishinde turaqty temperatýra bolýy qajet, onsyz jádigerlerdi saqtaý qıyn. Sondyqtan jylýdy eden arqyly jiberýdiń múmkindigi qalaı bolady, sol jaǵyn birlesip, qarastyryp kóreıik», dedi B.Isabaev.

Jalpy, mýzeıge 2013 jyly kúr­deli jóndeý, 2019 jyly aǵymdaǵy jóndeý jumystary júrgizilgen. Qazir mýzeı ja­­nyn­daǵy birneshe jyl qaraý­syz bos turǵan ǵımarat ót­ken jyldan beri mádenı-ǵylymı ortalyq retinde qaıta jańǵyrtýdan ótki­zi­lip jatyr. Bolashaqta bul nysan osy mýzeıge qarasty ǵy­lymı konferensııalar, túrli maz­mun­dy basqosýlar ótetin rýhanı orda bolady dep kútilýde..

 О́ńir ákiminiń baspasóz qyz­me­tiniń málimetinshe, Shan­hanaı aýyly arqyly Sh.Ýálıhanov kesenesine deıingi joldy ortasha jón­deýge osy jyly bıýdjetten­ 278 mln 674 myń teńge qara­jat bólinip, merdiger «Jetisý­jol qurylys» JShS jón­deý jumystaryn bıylǵy 15 sáýirde bastap ketken.

Jetisý oblysy