Úsh myń sarbaz ant berdi

Is-shara «Otan Ana» monýmentine gúl shoqtaryn qoıý­dan bastaldy. Saltanatty rá­simdi Qarýly Kúshterdiń ar­dagerleri, garnızon áske­rı qyz­metshileri, «Jas sarbaz» áskerı-patrıot­tyq qozǵa­ly­synyń tárbıe­le­nýshileri, ás­kerge shaqyry­lýshylardyń týǵan-týystary tamashalady.

Kóktemde ásker sapyn to­lyqtyrǵan jastar ant qa­byl­daǵan sátten bastap Qarý­ly Kúshter qataryna qosy­lady. Áskerı ant berý rásimi – árbir jas órenniń ómirin­degi mańyzdy oqıǵa. Dál osy kezden bastap jas jaýyngerler Otanymyzdyń naǵyz qorǵaýshysyna aınalady. Mine, kezekti tolqynǵa da bul kúnnen bastap Otandy qorǵaý degen qurmetti mıssııa júkteldi.

Buǵan deıin áskerge kelgen jastardyń bári jas jaýyn­ger kýrsynan abyroımen ótip, bir aı ishinde áskerı istiń negizderin ıgergen bolatyn. Olar jalpyáskerı jarǵylardy oqyp, saptyq, atys jáne dene shynyqtyrý daıyndyǵymen aınalysty. Áskerı bólim komandıri, podpolkovnık Abaı Álibekov jas jaýyngerlerdi aıtýly oqı­ǵamen quttyqtady. Ofıser olarǵa antqa adal bolyp, ás­kerı qyzmettiń mindetterine jaýap­kershilikpen qaraý kerek eken­digin basa aıtty.

«Búgin sender ómirdiń jańa kezeńine qadam bastyńdar. Ásker – ár jigit ótetin ómir mektebi. Áskerı qyzmet sen­derdi shynyqtyryp qana qoı­maıdy, munda shyńdalyp, óz qabiletterińe degen senim paıda bolady», dedi qatardaǵy jaýynger Danııl Pavlovtyń anasy, almatylyq Olga Alek­­sandrovna sarbazdarǵa ar­­naǵan tileginde.

Elordalyq brıgada ko­man­­dıriniń tárbıe já­ne ıdeo­­logııalyq jumys jónin­degi orynbasary, podpolkov­nık Talǵat Qulmanov áske­rı qyz­metpen ótetin bir jyl jas ji­git­ter úshin qan­daı paıdasy bolatynyna keńi­nen toq­taldy. Olar dene daıyn­dy­ǵy turǵysynan ny­ǵaıyp, na­ǵyz sarbaz atanady. So­nymen qa­tar olar JOO-ǵa jeńil­dik­­pen túsý múm­kindigine ıe bolady.

Almaty oblysynan shaqy­rylǵan qatardaǵy jaýynger Dinmuhamed Nurbolat ta óz oıyn bildirip, Otan qorǵaý qyzmeti olardyń kúsh-jigerin synaýǵa, áskerdi qýatty etýge jáne jaýynger dostar tabýǵa tamasha múmkindik ekenin atap ótti. «Bir aıda men áskerdiń kúndelikti ómirine úırendim, – dedi ol. – Al áskerı ant qa­byldaǵan kún árqashan esimde qalary sózsiz».

Bul kúni «Ońtústik», «Shy­­­ǵys», «Astana» óńirlik qol­bas­shylyqtarynda qyz­met ótkerip jatqan Qurlyq áskerleri áskerı bólimderiniń úsh myńnan astam azamaty áskerı ant berdi. Jas jaýyn­­­gerlerdiń ata-anala­ry ka­­zarma, ashana jáne oqý sy­nyp­­taryn aralap kó­rip, sar­bazdardyń turmys jaǵ­daıy­men tanysty.

Sondaı-aq osy kúni ásker salasynda taǵy bir saltanatty is-shara ótti. Ol – Almatyda uıymdastyrylǵan «Jas ulan» respýblıkalyq mektebiniń qyryq jyldyq mereıtoıy. Oǵan osy mekteptiń túlekteri – Qorǵanys mınıstriniń orynbasary Ásker Beısenov, Aýmaqtyq qorǵanys depar­tamentiniń bastyǵy, general-maıor Serik Borambaev, Qorǵanys mınıstrligi appa­raty basshysynyń oryn­ba­sary, polkovnık Tóle­gen Bólejanov arnaıy qatys­ty. Sonymen qatar shaqy­ryl­ǵan qonaqtardyń qataryn­da Qarýly Kúshterdiń ardageri, Halyq Qaharmany, otstav­kadaǵy general-leıtenant Ba­qytjan Ertaev, Áýezov aýda­nynyń ákimi Abzal Egem­berdıev, Baýyrjan Momysh­ulynyń kelini, etnograf, jazýshy Zeınep Ahmetova da boldy.

«Bul mekteptiń tárbıele­ný­shileri memleketke qyzmet etýdiń ozyq dástúrin jáne óz Otanyna adal bolýdyń úlgisin kórsetip keledi. Olar árqashan shydamdylyq, tó­zimdilik, moraldyq jáne psı­hologııalyq beriktikpen, kez kelgen qıyndyqty jeńe bilýmen erekshelenedi. Bul oqý ornynda memleketimizdiń jaýyngerlik daıyndyǵynyń irgetasy qalanyp jatyr», dep atap ótti Baqytjan Ertaev.

Is-sharada aty ańyzǵa aı­nalǵan qolbasshy Baýyrjan Momyshulynyń eskertkishine gúl shoqtary qoıylyp, rásim­ge qatysýshylar áskerı qaqty­ǵystarda qaza tapqan mektep túlekteri – podpolkovnık Er­lan Naýanovty, podpolkovnık Qaırat Muhamadıevti, kapıtan Qaırat Qudabaevty bir mı­nýt únsizdikpen eske aldy.