Tuǵyrnamalyq qujattar qabyldandy

Forýmǵa Memlekettik ke­ńes­­shi Erlan Qarın, Aqparat jáne qoǵamdyq damý mınıstri Darhan Qydyráli, Qazaq­stan musylmandary dinı basqar­masynyń tóraǵasy, Bas múftı Naýryzbaı qajy Taǵanuly, Sarapshylar keńesiniń músheleri, medrese-kolledj ben qarılar ortalyǵynyń dırektorlary, sondaı-aq elimizdiń ár aımaǵynan kelgen 350 ımam qatysty.

Quran aıatymen ashylǵan is-sharada múftııattyń jyl basynan beri atqarǵan is-sharalary týraly beınerolık kórsetildi. Forým baǵdarlamasyna sáıkes «Imamnyń jamaǵat nama­zyn ótkizý tártibi», «Qazaq­stan musylmandary dinı basqarma­synyń rýhanı (dinı jáne ulttyq) qundylyqtardy nasıhattaýdaǵy róli» jáne «Qajynyń rýhanı kelbeti» tuǵyrnamalyq qujattary talqyǵa salyndy.

Prezıdent Qasym-Jomart Toqaevtyń forýmǵa arnaǵan quttyqtaýyn oqyp bergen Mem­lekettik keńesshi Erlan Qarın qoǵamdaǵy ımamdardyń rólin aıryqsha atap ótti.

«Imam – halyqty birlikke úndeıtin, qoǵamdy meıirimdilikke shaqyratyn tulǵa. Adamdar­dyń kókiregine izgiliktiń dánin seýip, jurtshylyqty jaqsylyqqa nasıhattaıdy. Sondyqtan ımam­dardyń el ishindegi orny erekshe. Soǵan sáıkes olarǵa artylatyn jaýapkershilik te zor. Imam men jamaǵattyń arasynda ózara túsinistik, yntymaq pen qurmet bolsa, onda qoǵamnyń turaqtylyǵy da bekı túsedi. Jurt arasynda júrgende ımamdarmen jıi jolyǵysyp jatamyz. Sol kezde «Jamaǵatyńyz qalaı?» degen suraq qoıamyz. Sonda baıqaǵanym, búginde ımamdar jamaǵattary jaıynda aıtqanda erekshe meıirlenip ketedi. Meshitke kelýshilerdiń bir-birine kómek qolyn sozyp jatqanyn, súringendi demeıtin yntymaǵy bar ekenin aıtady. Bul el birliginde jańa irgetas qalyptasyp jatqanyn kórsetedi. Halyqtyń bir-birine sharapatyn tıgizip, aýyzbirshilikte ómir súrip jatqanyn naqtylaıdy. Osyǵan qarap, múftııat pen ımamdar­dyń jumysy tabysty iske asyp jatqanyna kýá bolamyz», dedi ol.

Bas múftı Naýryzbaı qajy Taǵanuly forým aıasynda talqylanyp jatqan qujattardyń mańyzyna toqtaldy.

– Búgingi forýmda birneshe qujat qabyldaýdy usynyp otyrmyz. Ár ımam ár óńirde rýhanı jetekshi bolǵandyqtan, jamaǵat oǵan uıyp, qulshylyq jasaıdy. «Imamnyń jamaǵat namazyn ótkizý tártibi» qujatyn qa­byldaýdaǵy maqsat – meshitterde kópshilikpen namaz oqý tártibin birizdilikke túsirý, jamaǵat arasynda túsinispeýshilikke jol bermeý, sonymen qatar ata-babamyz ustanyp kelgen dástúrli hanafı mázhabyn dáripteý. Allaǵa shúkir, búginde múftııat dinı ǵana emes, ulttyq qundylyqtarymyzdy nasıhattaıtyn rýhanı ordaǵa aınaldy. Biz ulttyq bolmysymyz ben musylmandyq kel­betimizdi saqtap qalý úshin Qazaqstan musylmandary dinı basqarmasynyń rýhanı, ıaǵnı dinı jáne ulttyq qundylyqtardy nasıhattaýdaǵy rólin arttyrýǵa basymdyq berip otyrmyz.

Qajylyqqa baryp jatqan otandastarymyzdyń qatary jyl sanap artyp keledi. Biz qajyny qurmettep, tórimizge shyǵarǵan halyqpyz. Onyń batasyn alýǵa tyrysamyz. Bul rette qajylarymyz da rýhanı tulǵasymen, kórkem minezimen, ádebimen aınalasyna úlgi-ónege bolýǵa tıis. Qajy bolý ómir boıy úlken jaýapkershilik júkteıdi. Búgin qabyldanatyn «Qajynyń rýhanı kelbeti» qujaty qajylarymyzdyń rýhanı jaýapkershiligin arttyrýdy kózdeıdi, – dep atap ótti Bas múftı.

Atalǵan qujattar biraýyzdan maquldanyp, jıyn sońynda forým qatysýshylarynyń Úndeýi jarııalandy.