Komıtet tóraǵasy Ashat Aımaǵambetovtiń jetekshiligimen ótken jıynǵa depýtattarmen qatar Úkimettiń, respýblıkalyq jáne jergilikti memlekettik organdar men úkimettik emes uıym ókilderi qatysty. Olar eldegi memlekettik satyp alý júıesiniń máselelerin talqylap, usynystaryn ortaǵa saldy.
Qarjy vıse-mınıstri Dáýren Keńbeıildiń málimetinshe, Dúnıejúzilik banktiń zertteýlerine sáıkes, Qazaqstannyń elektrondyq memlekettik satyp alý júıesi álemde úzdikter qatarynda. Búginde memlekettik satyp alý veb-portalyna 100 myńnan astam ónim berýshi men 24 myńnan astam tapsyrys berýshi tirkelgen.
Májilis depýtaty Rınat Zaıytov mektepter men mektepke deıingi mekemelerdegi kúzet qyzmetin memlekettik tapsyrysqa berýdi alyp tastaýdy, al Elnur Beısenbaev memlekettik satyp alý boıynsha azamattarǵa bilim berýdi júıeleýdi usyndy.
«Memlekettik satyp alý – kúrdeli sala, másele kóp. Sondyqtan sheshimderdi baıqap qabyldaýymyz kerek. Depýtattar tıisti normalardy daıyndap, Úkimet qorytyndysyna jiberdik. Olar boıynsha oń nátıje alamyz dep úmittenemin. О́ıtkeni bul – elge kerek sheshim», dep túıindedi A.Aımaǵambetov.
