Sýretterdi túsirgen Esenjol Isabek
Bıe sútiniń adam aǵzasyna asa paıdaly ekeni málim. Dárýmenge baı qymyzdyń ázirlený joldary da ártúrli. Ásirese Arqanyń bal tatyǵan qymyzyn ystyqta shólińdi qandyryp ishkenge ne jetsin! Bir qyzyǵy búginde Kerekýdi meken etken ártúrli ult ókilderi úshin qymyz dostyq sýsynyna aınalǵandaı. Onyń qasıetin, paıdasyn ózgeler joǵary baǵalaıdy. Jazdyń alǵashqy kúnderinde ótetin «Qymyzmuryndyqty» asyǵa kútip, arqa-jarqa bolyp qalatyny da sodan.
Bul jolǵy merekege Qyzylorda, Abaı óńirlerinen, elordadan arnaıy delegasııalar kelip, meıman boldy. Qonaqtar qur kelmeı, ulttyq buıymdar kórmesin uıymdastyrdy. Qyzylordalyqtardyń aıtýynsha, ondaǵy jergilikti jurt negizinen shubat ashytady.
– Jýyqta Astana qalasynda ulttyq bas kıim – taqııalar festıvaline qatysyp, pavlodarlyq áriptestermen tanystyq. Olar bizdi «Qymyzmuryndyqqa» shaqyrdy. Mádenı is-sharaǵa Qyzylordadan qolóner buıymdaryn jasaıtyn 10 sheber keldi. Taqııa, quraq kórpe túrlerin, jaınamaz, torsyq, ulttyq naqyshtaǵy sómkeler, túıe jún kórpe sekildi buıymdardy usyndyq. Ájelerimiz úıretip ketkendeı, túıeniń júnin óńdep, odan jyly kórpeler daıyndaımyz. Kerekýdiń qysy sýyq bolǵandyqtan, jergilikti halyqtan bul buıymǵa degen suranys joǵary, – deıdi Aral qalasynyń turǵyny Shamshyraq Seıilova.
Al Abaı oblysynan kelgen Anargúl Sátjanova kerekýlikterdiń óte qonaqjaı ekenin atap ótti. Oblys ortalyǵyna arnaıy ekskýrsııa uıymdastyrylyp, keıin Eskeldidegi Máshhúr Júsiptiń kesenesine saparlap qaıtqan. Esten ketpes sapar boldy deıdi qýanyshyn jasyra almaı.
Merekege jınalǵandarǵa dámdi baýyrsaq pen qymyz taratyldy. Ánnen shashý shashylyp, kópshilik ónerpazdardyń ónerine tamsana qol soqty. Osylaısha, «Qymyzmuryndyq» óńirde dástúrli túrde ótetin «Bir shańyraq astynda» jazǵy festıvalin resmı túrde bastap berdi.
PAVLODAR
