Ulttyq ekonomıka mınıstri Álibek Qýantyrovtyń aıtýynsha, Úkimet ázirlep jatqan tásilder bıznestiń salyq salý bazasyn keńeıtýge baǵyttalǵan. Salyq jeńildikteri naqty mýltıplıkatıvti áser alýǵa septigin tıgizedi. Mysaly, kompanııada salyq tóleý boıynsha jeńildetilgen rejim bolsa, onda ol mekeme jumys ornyn quryp, jańa ınvestısııany júzege asyryp, jergilikti qamtý úlesin kóbeıtýi tıis.
Ekinshi tásil júktemeniń basym bóligin tabysy joǵary salalarǵa yǵystyryp, halyqtyń aýqatty tobynan túsetin salyq túsimin arttyrýǵa baǵyttalǵan. Úshinshisi – halyqaralyq tájirıbege saı bolý jaıy. Kiristerge, onyń ishinde beırezıdentterge salyq salýdyń halyqaralyq tájirıbesin, sondaı-aq salalar boıynsha júktemeni bólýdi ımplementasııalaý usynylady.
«Salyq yntalandyrý tıimdiligin arttyrý maqsatynda ekonomıkanyń ártúrli sektoryndaǵy salyq mólsherlemelerin ártaraptandyrýǵa kóshý jaıy aıtylyp júr. Atap aıtqanda, QQS mólsherlemelerin tek jekelegen salalar boıynsha ǵana saralaý nemese qoldanystaǵy salyq mólsherlemesin saqtaı otyryp, salyq somasyn tómendetýge maqsatty yntalandyrýlar berý. Korporatıvti tabys salyǵy (KTS) boıynsha shıkizat jáne qarjy sektorynyń salyq mólsherlemesin joǵarylatý qarastyrylyp otyr. Sonymen qatar Memleket basshysy tehnologııalyq jańǵyrtýǵa jáne ǵylymdy damytýǵa baǵyttalǵan KTS paıdasyn azaıtý nemese bosatý tetigin engizý qajettigin atap ótti. Qoldanystaǵy zańnamada paıdany qaıta ınvestısııalaý kezinde KTS-ten bosatý qarastyrylǵan. Bul norma tek óńdeýshi ónerkásiptegi shaǵyn bıznes sýbektilerine ǵana qatysty. Búginde atalǵan normany orta bıznes sýbektilerine de qatysty etý talqylanyp jatyr», delingen vedomstvo habarlamasynda.
Strategııalyq josparlaý jáne reformalar agenttigi tóraǵasynyń orynbasary Oljas Tóleýovtiń aıtýynsha, salyq saıasatynyń turaqty, múmkindiginshe qarapaıym, túsinikti, sondaı-aq ádil bolýy óte mańyzdy.
«Salyq kodeksiniń aldyńǵy nusqalary, ádette, bıýdjettik turaqtylyqty qamtamasyz etý jáne onyń kiris bóligin keńeıtý turǵysynan jazylǵanyn atap ótý mańyzdy. Osylaısha, salyq saıasatynyń negizgi maqsaty ekonomıkanyń sapaly ósýi men ony ártaraptandyrý emes, salyq túsimderin ósirý boldy. Alaıda nomınaldy ishki jalpy ónimniń (IJО́) turaqty ósýine qaramastan, IJО́-ge salyq túsimderi tómendedi jáne olardyń dınamıkasy óte qubylmaly. Qazirdiń ózinde Qazaqstanda jan basyna shaqqandaǵy tabys deńgeıiniń kórsetkishteri deńgeıles basqa eldermen salystyrǵanda IJО́-ge túsetin salyq túsimderiniń kólemi tómen ekeni baıqalady. Negizinde salyq aýyrtpalyǵynyń tómendeýi salyq bazasyn keńeıtýge oń áser ete otyryp, ekonomıkalyq belsendilik pen tutynýdy yntalandyrýǵa ákelýi kerek. Al bul óz kezeginde salyq túsimderin ósirýi tıis. Alaıda bizdiń tájirıbemizde mundaı ózgeris bolǵan joq», deıdi ol.
Onyń aıtýynsha, qazir memlekettik organdardyń, naryqqa qatysýshylardyń, «Atameken» UKP jáne basqa da múddeli taraptardyń qatysýymen Ulttyq ekonomıka mınıstrliginiń bazasynda arnaıy jumys toby jumys istep jatyr. Memleket basshysynyń tapsyrmasyna sáıkes, Salyq kodeksiniń jobasy osy jyldyń sońyna deıin usynylýy tıis.
«Atameken» UKP tóraǵasynyń orynbasary Tımýr Járkenovtiń pikirinshe, jańa kodekste memleket pen bıznes róli qaıta qaralýy qajet. Nátıjesinde, salyq salýdy yntalandyrýdyń retteýshi júıesin jáne qyzmet kórsetýge baǵyttalǵan salyq qyzmetin qurý arqyly salyq tóleýshilerdiń múddeleri men memlekettik bıýdjet arasyndaǵy teńgerim qamtamasyz etilýi tıis.
