Eki jylǵa sozylǵan sot prosesiniń sheshimi boıynsha Birtanov shartty túrde bes jylǵa, onyń orynbasary Oljas Ábishev tórt jylǵa sottaldy. Alaıda eks-mınıstr taǵylǵan aıyppen kelispeıdi.
Eljan Birtanovtyń aıtýynsha, eshqandaı qylmys bolǵan joq.
«Negizi qylmys boıynsha sotta eki jaqqa da teń múmkindik berip, dálelder kórsetilýi qajet. Eń birinshi obektıvti dálel – «memleketke shyǵyn keltirdi» degen aıyppen kelispeý. Sol sııaqty qylmystyń motıvine baılanysty tergeý organdary men prokýratýra sotta taǵylǵan eki aıyp boıynsha eshqandaı dálel kórsetken joq», dedi eks-mınıstr.
Sondaı-aq ol onyń orynbasary Oljas Ábishev ekeýiniń arasynda eshqandaı motıv bolmaǵanyn aıtty.
Jýrnalıst mınıstrden 1.3 mlrd teńge aıyppuldy tóleý úshin qansha jyl kerek ekenin surady.
Burynǵy basshynyń aıtýynsha, onyń eshqandaı aktıvi de, bıznesi de joq.
«Naýryz aıynda qarjy aıyby boıynsha shaǵym jazyp, Joǵarǵy sotqa berdim. Maǵan jáne Oljas Ábishevke belgilengen shekteýden basqa 1,3 mlrd teńge ótemaqy qaıtarý týraly sheshim shyqty. Munymen de kelispeımin. Sot bárin biledi. Mende mundaı aqsha joq, bolǵan da emes. Men nege, ne úshin qaıtaramyn?
Bul aqshany Horvatııanyń kompanııasy atqarǵan jumysyna alǵan. Eger kompanııanyń jumysyna shaǵym bolsa, aıyppul ótemaqysyn nege Horvatııaǵa salmaıdy? Nege mamandaryn shaqyryp, qaıta jasatpaıdy? Sol jaǵy múldem túsiniksiz. Jaı qarapaıym adamǵa qalaı 3 mln dollar aıyppul salady? Men – dárigermin. Áıelim de dáriger. 30 jyl boıy memlekettik salada jumys istep kelemin. Eshqandaı aktıvim de, bıznesim de joq. О́mirge úsh márte qaıta kelsem de, 1,3 mlrd teńge aıyppuldy jabýǵa jetkize almaımyn. О́ıtkeni tabıǵatymyzdan elge eńbek etetin otbasymyz. Baýyrlarym da memlekettik qyzmette», dedi E.Birtanov.
Sondaı-aq ol úsh jumys ornynda júrip, otbasyn baǵyp júrgenin aıtty.
«Bank esepshottarym buǵattalǵan. Qazir bala-shaǵamdy asyraý úshin úsh jerde jumys isteımin. Úsh mekemeden alatyn aılyǵymnyń 50 paıyzy ótemaqy retinde Densaýlyq saqtaý mınıstrligine ketip jatyr», dedi ol.
Aıta keteıik, Densaýlyq saqtaý eks-mınıstri Eljan Birtanov pen orynbasary Oljas Ábishevke QR Qylmystyq kodeksiniń 361-baby, 4-tarmaǵy boıynsha aıyp taǵylyp, 2020 jyly qamaýǵa alynǵan edi.
