Shaıbaly hokkeıdiń eńsesin tikteımiz dep, elimizge kóptegen legıonerdi shaqyrttyq. Statıstıkaǵa myqtap den qoıyp, jilik maıyn shaǵyp júrgen belgili sport jýrnalısi Qanat Baıuzaqovtyń paıymdaýynsha, 1992-2022 jyldar aralyǵynda alys-jaqyn shet memleketterdiń 68 oıynshysy Qazaqstannyń azamattyǵyn alyp, álemdik dodada óner kórsetken eken. Olardy birneshe topqa bólýge bolady. Alǵashqy legi – О́skemende týyp, Reseıge qonys aýdarǵandar bolsa, kelesi bir toby – «Qazaqmys» klýbynda oınaǵandar. Odan keıingileri – «Barysta» jeıdesin kıe júrip, Qazaqstannyń namysyn qorǵaýǵa nıet bildirgender.
Ulttyq komandamyzdyń sapyndaǵy alǵashqy legıonerler – Igor Zemlıanoı men Konstantın Shafranov. Olar 1992 jyly álem chempıonatynyń irikteý týrnırine qatysty. Kóp uzamaı qatarymyz Leonıd Shılıaev, Andreı Sokolov, Vladımır Antıpın, Sergeı Kıslısyn, Igor Belıaevskıı, Andreı Solovev, Pavel Kamensev, Evgenıı Nabokov, Igor Nıkıtın, Oleg Krıajev, Mıhaıl Borodýlın, Anatolıı Fılatov, Vladımır Antıpın, Igor Dorohın, Vadım Glovaskıı jáne Dmıtrıı Dýdarevpen tolyqty. 1998 jyly Qazaqstan alǵash ret elıtalyq topta kúsh synasý qurmetine ıe boldy. Joǵaryda esimderi atalǵan oıynshylardyń birazy Shveısarııada jarys kórigin qyzdyrdy. Odan keıin de Reseıden kelgen kelimsekterdiń qatary kóbeımese esh kemigen joq.
2014 jyldan bastap Kanada, AQSh azamattary da elge kóptep kele bastady. Bul kóshti Úıeńki japyraqtar eliniń ókili Kevın Dallmen bastady. Izin sýytpaı Naıdjel Doýs, Dastın Boıd, Marten Sen-Per, Djessı Bleker, amerıkalyq Brendon Bochenskı, shvesııalyq Henrık Karlsson men Vıktor Svedberg jáne taǵy basqa sańlaqtar jalǵap, Qazaqstannyń týy astynda shaıbaǵa talasty. Desek te, bizge legıonerlerden esh paıda bolmady. Olar 10 álem chempıonatynda oıqastasa da, 10-orynnan asa almadyq. Bizdiń komandaǵa úzdik segizdiktiń sanatynan kórinip, pleı-offqa shyǵý baqyty birde-bir ret buıyrǵan joq.
Bıyl jaǵdaı kúrt ózgerdi. Latvııa men Fınlıandııa bıligi baıraqty báseke barysynda Reseı men Belarýs azamattaryn óz elderine kirgizgen joq. Onyń ústine, 2004 jyly Qazaqstannyń zańynda eki eldiń azamattyǵyn alýǵa resmı túrde tyıym salynǵany málim. Buǵan deıin oǵan mán bermeı kelgen edik. Osy joly belsendiler dúre kóterilip, osy máseleni bıliktiń qulaǵyna jetkizdi. Sodan respýblıkalyq hokkeı federasııasynyń basshylarynyń legıonerlerden bas tartýdan basqa amaly qalmady.
Joǵarydaǵy jaǵdaı buǵan deıin kóleńkede qalyp kelgen elimizdiń túlekterine dańǵyl jol ashty. О́zimizdiń ishki birinshilikterimizde tabysty óner kórsetip júrgen bir shoǵyr daryndy jastarǵa ulttyq komandamyzdyń jeıdesin kııýge múmkindik týdy. Shyny kerek, alǵashynda «kópti kórgen kánigi hokkeıshilersiz jaǵdaıymyz múshkil bolatyn shyǵar» dep oıladyq. Kóńilde kúmán men sekem basym boldy. Biraq bári beker eken. Bas komandamyzdyń tizginin ustaǵan Ǵalym Mámbetálıev qysqa ǵana merzim aralyǵynda jaqsy qurama jasaqtaı aldy.
Baltyq jaǵalaýynda bizdiń jigitter eń jas (oıynshylardyń orta jasy – 24,72) komandalardyń biri retinde attanǵanymen, táp-táýir oınady. Solardyń qatarynda 58 upaı jıyp, el birinshiliginiń eń úzdik surmegeni atanǵan Maksım Muhametov, el chempıonatynyń pleı-offynda 15 upaıdy qorjynǵa salyp, eń úzdik oıynshy retinde tanylǵan Batyrlan Muratov, «Barystyń» sapynda 62 kezdesý ótkizgen Dinmuhamed Qaıyrjan, Maksım Mýsorov, Ádil Beketaev, Valerıı Orehov, taǵy basqa saıypqyrandar aıshyqty ónerlerimen kózge tústi. Tájirıbeli Nıkıta Mıhaılıs pen Roman Starchenkonyń da eńbegin erekshe atap ótýge tıispiz. Álemdik doda barysynda Ádil Kanadanyń qaqpasyna gol salsa, Batyrlan Slovenııanyń qorǵanys shebinen sańlaý tapty. Sonymen qosa, ol óz áriptesterine úsh ret nátıjeli pas berdi. Al Maksım bolsa, osy jarysta úsh márte nysanany dál kózdedi.
Latvııanyń astanasynda jerlesterimiz jeti básekeniń úsheýin óz paıdasyna sheship, jeti upaıǵa ıelik etti. Nátıjesinde, 16 komandanyń arasynan 11-satyǵa taban tiredik. Osylaısha, qatarynan tórtinshi ret elıtalyq dıvızıonda óner kórsetetin boldyq. Osyǵan qarap, bizdiń jigitter de hokkeı oınaı alatynyna anyq kóz jetkizdik. Oıyndaryna «O keı» dep baǵa berdik. Olaı bolsa, aldaǵy ýaqytta qyrýar qarjy shyǵyndap, syrttan oıynshylar shaqyrtýdyń esh qajeti joq. Odan da óz órenderimizge senim artaıyq. Kelesi álem chempıonaty dál bir jyldan keıin Chehııanyń Praga men Ostrava qalalarynda ótedi. Sol jarysta jerlesterimiz budan da jaqsy kórsetkishke qol jetkizetinine senimdimiz.
