Áýeli alystaǵy Alakólge qalaı jetemiz degen máseleniń aldyn alaıyq. Bıyl emdik kólge barar jol taqtaıdaı tegis ekenin aıtqymyz keledi. Ol az deseńiz, ushaqpen jyldam ushyp barsańyz da bolady. Siz úshin Qazaq Air 22 mamyrdan bastap elordadan Jetisýdyń tórine kún saıyn ushpaq nıette. Ushýlar jańa generasııalanǵan de-Havilland Dash 8-Q400 kanadalyq áýe kemesinde oryndalady. Reıster jergilikti ýaqyt boıynsha júzege asady. Tústep kórsetsek: IQ 429 Astana 13.00 – Taldyqorǵan 14.45; IQ 430 Taldyqorǵan 15.15 – Astana 17.05. Ushý kestesi týraly aqparatty www.flyqazaq.com saıtynan bile alasyz. Bıletterdi brondaý jáne satyp alý úshin áýe kassalaryna habarlasýǵa bolady. Sondaı-aq áýe kompanııanyń saıtynan satyp alýǵa múmkindik bar.
«Esterińizge sala keteıik, Qazaq air áýe kompanııasy Qazaqstan qalalarynan Túrkistan, Omby jáne Ekaterınbýrgke halyqaralyq tikeleı jáne qosylatyn reısterdi oryndaıdy. www.flyqazaq.com saıtynan bıletterge qazirden bastap tapsyrys berip, bizben birge saıahattańyz» delingen áýe kompanııasynyń habarlamasynda.
Jańa shomylý maýsymyna demalys aımaqtarynyń ıeleri muqııat daıyndyq ústinde. Olar demalýshylardyń jaqsy tynyǵýy úshin barlyq jaǵdaıdy jasaıdy. Isker áıel Zýra Moldahanova – týrbıznes ardageri. Onyń aıtýynsha, 18 jyl ishinde týrıster áldeqaıda kóbeıgen. Nátıjesinde, turaqty klıentter qatary artqan.
«Biz jumysty Úsharal qalasyndaǵy dámhanadan bastadyq. Demalýshylar bul jerge únemi týystarymen keledi. Múmkin jer alyp, tynyǵýshylarǵa paıdasy bar arnaıy oryn salý kerek shyǵar. Kól sýynyń emdik qasıeti bar. Ol býyn men teri aýrýy bar adamdarǵa jaqsy kómektesedi. Sol sebepti sanatorıı jasaýǵa bolady dep oılaımyn», deıdi kásipker.
Qonaqúı nómirinde turý táýligine 10 myń teńgeden bastalady. Biraq pansıonat ıeleri jyl saıyn baǵany kóterýge májbúr. О́ıtkeni qyzmetkerler tabý qıyn. Kásipkerler eń qıyny qoqystyń tez jınalatynyn, jaǵalaýda jýynatyn orynnyń joq ekenin aıtady.
Bıyl sheneýnikterdiń jospary boıynsha Alakólge 1,5 mıllıon demalýshy kelmek. Kólge irgeles aýmaqta 300-ge jýyq demalys aımaǵy bar. Jańa maýsymda olarǵa taǵy 14-i qosylady.
«Maýsymnyń ashylýyna daıyndyq júrip jatyr. Biz otandyq týrızmdi damytýǵa tyrysamyz. Alakól kóli úzdik 10 týrıstik orynǵa kiredi. Sondyqtan biz demalýshylarǵa barlyq jaǵdaıdy jasaýǵa tyrysamyz», deıdi Alakól aýdanynyń kásipkerlik bóliminiń basshysy Dáýlet Jýandyqov.
Qalaı bolǵanda da jaǵajaıǵa ońtaıly jetýge áli kóp kúsh jumsalýǵa tıis. О́ıtkeni bul jerge taıaýda myńdaǵan demalýshy aǵylady. Iаǵnı jergilikti bılik pen kásipkerler úshin óte mańyzdy.
Jalpy, oblysta týrızm salasynyń da áleýeti zor. Jetisý jeriniń tabıǵı-klımattyq jaǵdaıynyń qolaıly bolýynyń nátıjesinde bizde týrızmniń barlyq túrin damytýǵa múmkindik bar. Bul óz kezeginde týrıstik básekelestikte birshama eleýli artyqshylyq beredi. Týrıstıfıkasııa kartasyna sáıkes basym obektiler tizbesine 5 destınasııa: Alakól, Balqash kólderiniń jaǵalaýlary, «Altynemel», «Jońǵar-Alataý» ulttyq parkteri jáne Tekeli taýlary engizildi. Olardy damytý maqsatynda ınfraqurylymdyq jobalar iske asyrylyp jatyr.
«Alakól kóliniń jaǵalaýynda eki jyl ishinde servısti kóterip, demalýshylar úshin ınfraqurylymdy óte jaqsy deńgeıge jetkize aldyq. Týrısterdi yńǵaıly jetkizýdi uıymdastyrý boıynsha jumystar júrgizilýde. Úsharal qalasy áýejaıynyń ushý-qoný jolaǵyn qaıta jańartý aıaqtalyp, «Taldyqorǵan-Úsharal» (313,5 km), «Úsharal-Dostyq» (184 km) avtomobıl joldarynyń asfaltbeton jabyny qamtamasyz etilip, «Talgo» júrdek poıyzy iske qosyldy», deıdi jaýapty mamandar.
Alakólden bólek, Balqash kóli de týrıster úshin tartymdy oryndardyń biri sanalady. Ony damytý baǵytynda uzyndyǵy 16,3 shaqyrym týrıstik-rekreasııalyq aımaq qurylady. 40 mlrd teńgeden asa ınvestısııa tarta otyryp, bólme qory 45 myńǵa jýyqtaıtyn ornalastyrý oryndaryn salý josparlanyp jatyr.
Jaǵalaýǵa deıingi joldyń qurylysy kelesi eki jyl ishinde aıaqtalady. Sonymen qatar Memleket basshysynyń tapsyrmasy boıynsha Jońǵar Alataýynyń etegindegi Tekeli qalasynda týrıstik ınfraqurylym nysandaryn salý kózdelip otyr. Nátıjesinde, 2025 jylǵa deıin tartylatyn ınvestısııalar kólemi 79,1 mlrd teńgege, al týrıster legi 2,4 mln adamǵa jetedi dep kútilýde, bul bıýdjettiń kiris bóligine qomaqty úles qosady.
Jetisý oblysy
