Mektepte 8 synypta oqyp júrgende elordada ótetin «Jas Astana jas jetkinshekter kózimen» halyqaralyq festıvaline shaqyrý alyp, tóbemiz kókke jeterdeı qýandyq. Aýyldan uzap shyǵyp kórmegen bizdiń bala qııalymyz jańa astanaǵa oısha júz baryp, júz sharlap qaıtatyn. Sóıtip, arman bolǵan Astanaǵa ǵasyrlar toǵysynda, 2000 jylǵy 10 maýsymda kelý buıyrdy.
Elordada myńjyldyqtar merekesi «Mıllenıým-patı-Astana» saltanatty sharasy dúrkirep ótip jatqan kez edi. Erke esildiń jaǵasynda, kórgen jurt aýzyn ashyp, kózin jumyp tamsanǵan ǵalamat konsert ótti. Sol kezdegi (2000 jyl) Qoǵamdyq kelisim, aqparat jáne mádenıet mınıstri Altynbek Sársenbaıulymen kezdesip, ol kisiniń qolynan alǵys hat alǵanymyz bala kezimizdegi esten ketpes, ǵajap oqıǵa bolǵany anyq.
Osy sapar týraly kúndeligime bylaı dep jazyppyn: «Astanadaı qalany, Altynbekteı aǵany kórgen bizde ne arman bar? Qazaqtyń jerinde, elorda tórinde turyp, boıymyzdy qýanysh kernedi. Bir armanym – jańa astanany kórý edi, oryndaldy, endigi tilegim – keleshekte osy qalada turyp, qyzmet istep, urpaq órbitip, tamyrymdy tereńge jaısam deımin. Iıa, jaratqan, óziń jar bolyp, tilegimizdi qabyl et!»..
Araǵa on jyl salyp, Astanaǵa otbasymyzben kóship keldik. Qalamy júırik kil myqty jýrnalıstiń basy quralyp, «Halyq sózi» atty respýblıkalyq gazetti jaryqqa shyǵardyq. Basylym betinde elorda men onyń turǵyndarynyń qordalanǵan kóp máselesine qozǵaý salyp, sheshimin tabýyna gazet arqyly yqpal etkenimiz ras. Ásirese astananyń qazaqylanýyna qazaq baspasóziniń sińirgen eńbegi kóp.
Sol kezde elordada árbir jańa týǵan sábıdiń qurmetine bir túp aǵash egý dástúrge aınalǵan edi. Shúkir, bul kúnde ekken aǵashymyz jaıqalyp ósip, tókken terimiz tekke ketpedi. Qazaq mundaıda «Mańdaıyńnyń baǵy bes eli eken» dep jatýshy edi, bes birdeı urpaq súıip, kóp balaly otbasy atandyq. Ata-anamyz da elordaǵa qonys aýdaryp, ortamyzdy toltyryp, otbasymyzdy baıytyp otyr. Táýbe!
Osylaısha bala kezgi armanymyz aqıqatqa aınalyp, arqa tósinde órisimiz keńeıip, yrysymyz molaıyp, tamyrymyzdy tereńge jaıyp kelemiz.
Astanamyzdyń shırek ǵasyrlyq toıy qutty bolsyn!
