Kollajdy jasaǵan Záýresh SMAǴUL «EQ»
Stıv Djobs 21 jasynda dosy Stıv Voznıakovpen óz kompanııasynyń irgetasyn qalaǵany barshaǵa málim. Al oǵan deıin Stıv kolledjde oqyǵan. Biraq aıaqtaı almaǵan. Ony kolledjden shyǵaryp jibergen. Tipti bolashaq kásipker esirtki qoldanyp, Úndistanda 7 aı turyp, rýhanı azyq alyp, emdelgen eken.
Djobs Oregon shtatyndaǵy Rıd kolledjinde bilim alǵan. Alǵashqy kýrsta mıllıonerdiń esinde qalǵany – kallıgrafııa. Qazaqsha tápsirlesek, kallıgrafııa – qusnı hat, ıaǵnı ádemi jazý óneri. Mine, bolashaq mıllıonerdiń kásibiniń alǵashqy qadamy da dál osy ónerden bastalǵan. Stıv kallıgrafııaǵa bar yntasymen berilgen. Dál sol ýaqytta ónertapqysh adamdarǵa mınımalıstik ári fýnksıonaldy dızaınniń kerek ekenin túsinedi. Onyń 2011 jyly ekinshi aıpadty «óner jáne jańa tehnologııalar qıylysy» degen jazbamen kópshilikke tanystyrýy da sondyqtan. Djobs álgi is-sharada «Apple»-diń DNK-syna bir ǵana tehnologııa jetkiliksiz. Tehnologııa men ónerdi, gýmanıtarlyq ǵylymdardy biriktirip, onyń nátıjesin kórgende ǵana júregimizdiń qaǵysy jıileıtini anyq», degen eken.
Al endi maqalanyń taqyrybyndaǵy suraqqa keleıik. Iá, hakerler «Apple» men Stıv Djobsty unatpaıdy. Sebebi ónertapqysh jabyq júıelerdi oılap tapqan. Ol bógde adamdar kirip, ózgertýler men túzetýler engize almaıtyn minsiz qurylǵyny jasap shyǵardy. Al mundaı jaǵdaıda hakerlerdiń qara terge túsetini aıtpasa da túsinikti. Áýelde Djobs uıaly baılanys quralyna «Apple»-diń arnaıy qosymshalaryn ǵana ornatýdy kózdegen. Keıin ony qyzmetkerleri raıynan qaıtarypty.
Djobs ómirden ótip ketse de, kompanııasynyń jumysy tabysty jalǵasyp jatatyn adamdarǵa tánti bolǵan eken. «Apple»-diń de ózinen keıingi ǵumyry osylaı bolsa eken dep armandapty. Onyń asqaq armany oryndalǵanyna siz ben biz kýámiz. Satylym boıynsha «Apple» rekord jańartýdan aldyna qara salar emes. Bul kompanııa áýeli álem boıynsha alǵash ret 1 mlrd dollarǵa teń satylym jasady. Keıin bul rekordy jańartyp, 2 mlrd dollar qarajat jınady. 2021 jyldyń qańtar aıynda belsendi «Apple» qoldanýshylarynyń sany 1 mıllıard adamǵa jetkenin de qaperińizge sala keteıik.
Aıtpaqshy, tirisinde Djobstyń ústinen qara jeıdeni tastamaıtynyn kórgen shyǵarsyz. Bul ony ózgelerden ereksheleıtin obraz. Ony japondyq dızaıner Isseı Mııake Stıvke arnap 10 danasyn tikken. Djobstyń bul jeıdege kóńil aýdarýy da tekten-tek emes. Ol 1980 jyly Japonııada «Sony» kompanııasy qyzmetkerleriniń jumysqa arnalǵan arnaıy formasyn kóripti. Bul ónertapqyshtyń kóńilinen shyqqan ári formany «Apple» qyzmetkerlerine usynǵan. Alaıda jumysshylar men Djobstyń talǵamy sáıkes kelmeı olar qara jeıdeden birden bas tartypty. Biraq mıllıoner qara jeıdesin tastaǵan emes. Keıin bul obraz jalpyhalyqtyq sıpat aldy.
