Bul aýylda buryn-sońdy mádenıet úıi bolmaǵan. Osy ýaqytqa deıin kitaphana shaǵyn balabaqsha ǵımaratynda ornalasqan edi. Aýmaǵy óte tar bolǵandyqtan, ártúrli sharalar ótkizýge de qolaısyz-tuǵyn. Sondyqtan da bul kúni aýyl turǵyndary úshin aq túıeniń qarny jarylǵandaı boldy. Saltanatty jıynǵa aýdan basshylyǵy qatysyp, aýyl turǵyndaryn kópten kútken qýanyshpen quttyqtady. Erekshe úlgide salynǵan mádenıet úıiniń ashylýyna kelgen qonaqtar da ózderiniń jyly lebizderin bildirdi. Kóp jyl aýyldyq kitaphanada qyzmet atqarǵan aq jaýlyqty áje Gúljamal Kijikova kıeli shańyraqtan bereke-birlik, yntymaq arylmasyn degen nıetpen shashý shashty.
Keń ári jaryq ǵımarattyń ekinshi qabatynda ashylǵan kitaphana jańa ústeldermen, jumsaq oryndyqtarmen jáne kitap sórelerimen qamtamasyz etildi. Qazirgi ýaqytta kitaphanada oqyrman sany 608-ge jetken. 9 748 kitap qory bar. Jańa kitaptarmen jyl kóleminde úzdiksiz tolyqtyrylyp keledi. Sonymen qatar kitaphanada shahmat, doıby úıirmesi jumys istep tur. Zaman talabyna saı ınternet jelisimen, kompıýtermen, qujattardy sıfrlaýǵa, qaǵazǵa basyp shyǵarýǵa arnalǵan kópfýnksııaly qurylǵymen qamtamasyz etilgen. Ataýly kúnderge, aıtýly datalarǵa baılanysty túrli kezdesýler, suhbattar, oqyrman konferensııalary, dóńgelek ústelder ótkizilip turady. Atap aıtsaq, «Dúnıejúzilik kitap jáne avtorlyq quqyqty qorǵaý» kúnine oraılastyrylǵan «Kitap shoý-2023» respýblıkalyq aksııasy aıasynda Aınabulaq aýyldyq kitaphanasynda da kitap festıvali ótti. Is-sharada oqyrmandarǵa «Qııaldar álemi» atty kitap kórmesi usynyldy. Kórmege oqyrmandar nazaryna ár eldiń ertegi kitaptary, kórkem sýrettelgen ıllıýstrasııaly kitaptar men QR kod arqyly uıaly telefonnan kórýge arnalǵan ertegiler jınaǵy qoıyldy. Sonymen qatar ertegi keıipkerleriniń maketter kórmesi usynylyp, qııaldar álemine saıahat jasaldy. Osy oraıda «Meniń súıikti keıipkerim» taqyrybynda oqyrmandarmen pikirlesý, oı almasý ótti.
Shyǵys Qazaqstan oblysy,
Zaısan aýdany
