Sýret: primeminister.kz
Jandos О́mirálıevtiń aıtýynsha, búginde «eki jáne odan da kóp adamnyń qaza bolýyna ákep soqqan órt qaýipsizdigi talaptaryn buzý» 292-baby 3-bóligi boıynsha qylmystyq is qozǵalǵan. Memleket basshysy Qasym-Jomart Toqaevtyń tapsyrmasy boıynsha tergeý jumystaryn Bas prokýratýra júrgizip jatyr. Vedomstvonyń arnaıy qyzmeti tergeýge kiristi, vedomstvoaralyq tergeý-jedel toby qurylyp, oǵan barlyq quqyq qorǵaý qyzmetteriniń eń tájirıbeli, bilikti tergeýshileri men jedel qyzmetkerleri kirdi. Jumys tobyn Bas prokýrordyń orynbasarlarynyń biri basqarady. Is Bas prokýrordyń erekshe baqylaýynda.
«Sonymen qatar osy tragedııanyń aýqymyn, ekologııaǵa keltirilgen zalaldy, eń bastysy – qyzmettik mindetterin atqarý kezinde 14 orman qyzmetkeriniń qaza tabýyn eskere otyryp, biz de laýazymdy tulǵalarǵa qatysty qylmystyq is qozǵadyq. Osy qylmystyq isti tergeý sheńberinde óz mindetterine, qyzmetine josyqsyz, jaýapsyz qaraǵan, sonyń saldarynan ózine júktelgen mindettemelerdi oryndamaǵan, osyndaı qaıǵyly oqıǵalar men adam ólimine ákep soqqan barlyq laýazymdy adamdardyń sheńberi belgilenetin bolady», dep túsindirdi Jandos О́mirálıev.
Bul rette Tótenshe jaǵdaılar mınıstrliginiń burynǵy basshysy Iýrıı Ilın, Ekologııa jáne tabıǵı resýrstar mınıstri Zýlfııa Súleımenova, Abaı oblysynyń ákimi Nurlan Uranhaev, Shyǵys Qazaqstan oblysynyń ákimi Danıal Ahmetov syndy laýazymdy tulǵalardyń is-áreketine áli eshqandaı baǵa berilgen joq.
«Qozǵalǵan qylmystyq is aıasynda qyzmettik mindetterine qatysty tıisti shara qoldanbaı, sonyń saldarynan aýqymdy órt pen adam ólimine ákep soqtyrǵandardyń bári sózsiz jaýapkershilikke tartylady. Qazir sheneýnikterdiń áreketi saralanǵan joq, tergeý endi bastaldy. Aıta ketsem, jaýapqa tek basshylar ǵana emes, orta býyn basshylary da tartylady, olar qazir órtti sóndirýge atsalysyp jatqanyn eskerdik. Bizdiń basty maqsatymyz – órtti sóndirý. Biraq aldaǵy ýaqytta olardan mindetti túrde jaýap alynady. Tergeý merzimi - eki aı», dep sendirdi Bas prokýrordyń orynbasary.
