Qalaı desek te, 15 adamnyń ómirin jalmaǵan órt kóp shyndyqtyń betin ashyp, salaǵa salmaqty ózgeris ákeletindeı.
Qazaqstan Respýblıkasy Bas prokýrorynyń orynbasary Jandos О́mirálıevtiń aıtýynsha, búginde Qylmystyq kodekstiń 292-baby 3-bóligi «Eki jáne odan da kóp adamnyń qaza bolýyna ákep soqqan órt qaýipsizdigi talaptaryn buzý» boıynsha qylmystyq is qozǵalǵan. Memleket basshysy Qasym-Jomart Toqaevtyń tapsyrmasy boıynsha tergeý jumystaryn júrgizý Bas prokýratýra quzyryna júktelgen. Naqtysy orman órtine qatysty is Bas prokýrordyń erekshe baqylaýynda.
«Osy tragedııanyń aýqymyn, ekologııaǵa keltirilgen zalaldy, eń bastysy, qyzmettik mindetterin atqarý kezinde 14 orman qyzmetkeriniń qaza tabýyna baılanysty laýazymdy tulǵalarǵa qatysty qylmystyq is qozǵadyq. Osy qylmystyq isti tergeý sheńberinde óz mindetterine, qyzmetine josyqsyz, jaýapsyz qaraǵan, sonyń saldarynan ózine júktelgen mindettemelerdi oryndamaǵan, osyndaı qaıǵyly oqıǵalar men adam ólimine ákep soqqan barlyq laýazymdy adamdar qatary belgilenetin bolady», dep túsindirdi Jandos О́mirálıev.
Onyń aıtýynsha, Tótenshe jaǵdaılar mınıstrliginiń burynǵy basshysy Iýrıı Ilın, Ekologııa jáne tabıǵı resýrstar mınıstri Zýlfııa Súleımenova, Abaı oblysynyń ákimi Nurlan Uranhaev, Shyǵys Qazaqstan oblysynyń ákimi Danıal Ahmetov syndy laýazymdy tulǵalardyń is-áreketine áli eshqandaı baǵa berilmegen.
«Qozǵalǵan qylmystyq is aıasynda qyzmettik mindetterine qatysty tıisti shara qoldanbaı, sonyń saldarynan aýqymdy órt pen adam ólimine ákep soqtyrǵandardyń bári sózsiz jaýapqa tartylady. Qazir sheneýnikterdiń áreketi saralanǵan joq, tergeý endi bastaldy. Aıta ketsem, jaýapqa tek basshylar ǵana emes, orta býyn basshylary da tartylady, olar qazir órtti sóndirýge atsalysyp jatqanyn eskerdik. Bizdiń basty maqsatymyz – órtti sóndirý. Biraq aldaǵy ýaqytta olardan mindetti túrde jaýap alynady. Tergeý merzimi eki aı», dep málimdedi Bas prokýrordyń orynbasary.
О́rt jaılaǵan shaqtan beri «aty shyqqan» Borodýlıha aýdanyna ákim bolyp buǵan deıin Abaı oblystyq Mádenıet, tilderdi damytý jáne arhıv isi basqarmasynyń basshysy qyzmetin atqarǵan Aıdar Ibraev taǵaıyndaldy.
«Qazaqstan Respýblıkasy Prezıdenti Ákimshiligi men Borodýlıha aýdanynyń máslıhat depýtattarynyń kelisimimen jáne Abaı oblysy ákiminiń ókimimen Borodýlıha aýdanynyń ákimi laýazymyna taǵaıyndaldym.
Aýdan aýmaǵynda bolyp jatqan órtpen kúreste jan tapsyrǵan 14 ormanshynyń otbasyna, týystary men jaqyndaryna qaıǵyryp kóńil aıtamyn.
О́rtti sóndirýge qatysyp júrgen sarbazdar, ormanshylar men áskerı qyzmetkerlerge, eriktilerge, kásipkerler men sharýa qojalyqtaryna, árbir aýdan turǵynyna erligi, qoldaýy men kómegi úshin shyn júrekten alǵys bildiremin», dedi ol óziniń jeke paraqshasynda. Jalyn jaıpaǵan aýdanǵa jańadan qyzmetke kelip jatqan ákimniń qadamy qaıyrly bolyp, tótenshe jaǵdaıdyń tezirek aıaqtalýyna mol járdemi tıse eken dep tilek qostyq.
Al qazirgi ýaqytta TJM órtke qarsy komıtet basshysy Nurbolat Derbisov Astana jáne О́skemen qalasynan kelgen áriptesterimen birlese qımyldap, Shýlba sý qoımasyna tóngen qaýiptiń aldyn alyp úlgerdi.
«О́rt sóndirýshilerdiń shuǵyl áreketteriniń arqasynda Shýlba GES-ine tóngen qaýip aýyzdyqtaldy», dep málimdedi N.Derbisov.
Abaı oblysy
