Májilis depýtaty Aqsý qalasyna jeke qazandyq qoıý máselesi qolǵa alynǵanymen, istiń aıaǵyna deıin jetpeı qalǵanyn aıtty. Oǵan sebep qarajattyń jetkiliksiz bolýy.
«Búgingi bizdi tolǵandyryp otyrǵan másele – Pavlodar oblysyna qarasty Aqsý qalasynyń jylý máselesi. Atap aıtar bolsaq, 73 myńdaı halyq turatyn shahar búginde Aqsý ferroqorytpa zaýytynyń qazandyǵy arqyly jylytylyp keledi. Onyń da qazandyqtarynyń tozyǵy jetip turǵandyǵy jasyryn emes. Oǵan qalanyń eskirgen ishki jylý júıesin qosyńyz. Alda-jalda apat oryn ala qalsa, Ekibastuzdyń kúıine túsýi múmkin ekendigin eskertemiz. 2016 jyldan qolǵa alynyp, 2017 jyldyń qalaǵa jeke qazandyq salý jumysy bastalǵan. «Aqsý qalasynyń qurylys bóliminiń» tapsyrysy boıynsha 10 mıllıard 698 mıllıon teńge bólinip qurylys jumystary bastalǵan. Alaıda qarjy jekiliksiz dep tanylyp, osy ýaqytqa deıin jalpy alǵanda 12 mıllıardqa jýyq qarajat jumsaldy», dedi Jarqynbek Amantaıuly.
Depýtat «Qystyń qamyn jaz oıla» dep osy bastan dabyl qaǵyp otyrǵanyn jetkizdi. Sondaı-aq qurylysqa jaýaptylardy anyqtaý keregin de atap ótti.
«Endi, el bıýdjetinen mıllıardtaǵan qarajat jumsalǵan qurylys úshin kim jaýap beredi? Bul arnaıy tekseristi, jeke-dara qaraýdy qajet etetin saýal. Sondyqtan erteń qystyń kózi qyraýda Aqsý qalasynyń turǵyndary da jylýsyz qalýy múmkin degen qaýippen dabyl qaǵyp otyrmyz. Ári arnaıy sharalar qabyldanyp, másele shuǵyl sheshimin tabýy kerek», dedi Májilis depýtaty Jarqynbek Amantaıuly.
