Qazaqstan sapynan 60 kelige deıingi salmaqta baq synaıtyn Maǵjan Shamshadın alǵashqy beldesýinde Ázerbaıjan sportshysy Nazır Talıbovty utty. Kelesi kezdesýinde Maǵjan Bahrom Botýrovty (О́zbekstan) ıppon upaıymen jeńgen ol, jartylaı fınaldyq beldesýde Merzod Sýfıevten (Tájikstan) basym tústi. Aqtyq synda sportshymyz Fransııa ókili Sedrık Revolmen beldesedi.
Jarysqa ekinshi aınalymnan qosylǵan Ǵusman Qyrǵyzbaev (-66kg) álem chempıony Iаgo Abýladzeni san qaptyryp, kezindegi esesin qaıtardy. Kelesi qarsylasy Narmandah Baıanmýnhty (BAÁ) senimdi túrde utyp, shırek fınalǵa joldama alǵan ol, ázerbaıjandyq dzıýdoshy Kamran Sýleımanovty da artta qaldyrdy. ½ fınalda Ǵusman ózbek balýany Muhrıddın Tılolovty jeńip ketti.
Áıelder arasynda (-48 kg) salmaq dárejesinde baq synap jatqan Ǵalııa Tynbaeva qola medal úshin baq synasady. Alǵashqy kezdesýinde Belgııa sportshysy Lýız Petıtti jeńgen Ǵalııa, shırek fınaldyń joldamasy úshin ózbek qyzy Halımdjon Kýrbonovaǵa ese jibergen bolatyn. Osylaısha, jubanysh beldesýinde portýgalııalyq Kosta Katarınany jeńip, qazaqstandyq sportshy úshinshi orynǵa kúresý múmkindigin aldy.
Fınaldyq beldesýler Astana ýaqytymen saǵat 17:00-de bastalady.
Aıta ketsek, jarystyń birinshi kúni tatamıge 48 keli, 52 keli, 57 kelige deıingi salmaq dárejelerindegi áıelder jáne 60 keli, 66 kelige deıingi salmaq dárejelerinde beldesetin erler shyqty. Bul jarysta barlyǵy 42 eldiń 334 sportshysy baq synap jatyr.
Álemdik doda Astanadaǵy «Barys Arena» sport kesheninde 16-18 maýsym aralyǵynda ótedi. Jarysty tikeleı efırde Qazsport jáne Judotv.com onlaın-platformalary kórsetedi.
Aıta keteıik, bul dodanyń nátıjesinde IJF erejelerine sáıkes jarystyń jeńimpazdary men júldegerleri arasynda Álemdik jáne olımpıadalyq reıtıngterde upaılar bólinedi. Atap aıtqanda, 1 oryn úshin – 1000, 2 oryn úshin – 700, al 3 oryn úshin – 500 upaı esepteledi.
«Qazaqstan barysy Grand Slam» týrnırinde dzıýdoshylar 2024 jyly Parıjde ótetin Jazǵy Olımpıada oıyndaryna qatysý úshin upaı jınaıdy. Úsh kúnge sozylatyn baıraqty básekege kirý tegin.
