Ult uıasy Ulytaýdan bastalǵan kósheli áńgime qazaqtyń rýhanı baıtaǵy, elimizdegi ıslam dininiń dińgegi ispetti, «eki dúnıe esigi» – qasıetti Túrkistanǵa jalǵasýy sodan bolar. Ultymyzdy birlikke bastaıtyn bul alqaly jıynǵa qatysýshy zııaly qaýym kelesi jyly munaıly astanamyz Atyraýda bas qospaq.
Qasym-Jomart Toqaev dıplomat retinde dúnıedegi oqıǵalarǵa ádil de shynshyl baǵasyn berdi. «Biz qazir halyqaralyq ahýaldyń buryn-sońdy bolmaǵan deńgeıde shıeleniskenine kýá bolyp otyrmyz. Keıbir iri elder ózine qajetti kún tártibin basqalarǵa tańýǵa, olardy óz talabyna ıkemdeýge tyrysýda. Bir-birine múldem qaıshy keletin túrli ıdeıalar men ustanymdar qaqtyǵysy beleń aldy», dedi Q.Toqaev.
Shyn máninde geosaıası jaǵdaı kúnnen-kúnge kúrdelenip barady, sol úshin de eldiń ishinde tynyshtyq, ultqa sútteı uıyǵan yntymaq, al syrtqy saıasatta «ur da jyq» emes, sabyrly da salmaqty sarabdal ustanym qajet. Osyǵan oraı, Prezıdent búgingi almaǵaıyp zamanda elimiz buryn-sońdy bolmaǵan deńgeıde birtutas bolýy kerek ekenin basa aıtty.
Jańa Qazaqstan ózinen ózi quryla salmasy anyq. Sondyqtan da Memleket basshysynyń zamanaýı bilimge, urpaq tárbıesine, sonyń ishinde jastardy eńbekke baýlýǵa shaqyrýy óte ózekti. Aldaǵy ýaqytta naǵyz eńbek adamynyń ıdealy qoǵamnyń basty baǵyt-baǵdary bolmaq.
Al sapaly bilim men taǵylym kitaptarmen keleri sózsiz. Osy oraıda Qasym-Jomart Kemeluly eń qajetti de qundy kitaptar jınaqtalǵan Prezıdent kitaphanasyn uıymdastyrý jóninde oıymen bólisti. Jáne de onyń esigi oqyrmandar úshin táýlik boıy ashyq bolatynyn erekshe atady. Menińshe, bul – taıaýda oryndalatyn ulaǵatty is!
Prezıdent jer máselesine qatysty artyq-aýys áńgimege núkte qoıdy. Memleket basshysy elimizdiń jeri babalarymyzdan qalǵan asyl mura retinde tek Qazaq eline tıesili ekenin, sol sebepti týǵan jerdiń bir pushpaǵy da eshbir sheteldikke berilmeıtinin, ony shetke satýǵa tyıym salynǵanyn taǵy bir nyqtap aıtty.
Sondyqtan osyndaı qaýeset áńgimeni doǵaryp, jerge qamqorlyqpen qarap, onyń berekesine bólený – saýapty is. Bul rette at tóbelindeı az aǵash-orman sekildi baılyǵymyzdy aıalap baǵý – ózekti másele. Ormany qalyń shekaralas mekende Katonqaraǵaı ulttyq parki ornalasqan el shyǵysyndaǵy aýdandardy qaıta qalpyna keltirý de Prezıdenttiń halyq pikirine qulaq asatyn saıasatker ekenin tanytyp otyr.
Aıgúl QUSPAN,
Májilis depýtaty
