FILARMONIA FEST-2023 jobasy Qazaqstannyń mýzyka mádenıetin tanymal etý, otandyq ónerdiń gýmanıstik jáne rýhanı baǵdary arqyly halyqtyń ártúrli toptaryn tárbıeleý jáne kórkem shyǵarmashylyqqa baýlý maqsatynda ótkiziledi. Aýqymdy mýzyka merekesi qoǵamda merekelik atmosfera men jaǵymdy kóńil-kúı qalyptastyrýǵa, fılarmonııanyń shyǵarmashylyq ujymdarynyń týyndylaryn tanymal etip, jeke brendti qalyptastyrýǵa, otbasylyq qundylyqtardy damytýǵa, óskeleń urpaqtyń adamgershilik jáne kórkemdik baǵdarlaryn qalyptastyrý úshin baǵyttalǵan.
Jobaǵa fılarmonııanyń shyǵarmashylyq ujymdary men solısteri, naqtyraq aıtqanda 500-ge jýyq ártis qatysady. Balalardyń shyǵarmashylyq jáne bilim berý stýdııalarymen, sırk ártisterimen yntymaqtastyq josparlanyp otyr.
24 maýsym kúni saǵat 11.00-den 21.30-ǵa deıin Kenesary kóshesi, 32 mekenjaıyndaǵy fılarmonııa ǵımaratynyń aldyndaǵy alańnan Esil ózeniniń jaǵalaýyna deıin túrli is-sharalar ótedi:
- 11.00-den 13.00-ge deıin «Mýzyka balalar kózimen» balalar sýret baıqaýy. «Bormen sýret salý», «Músin», «Kompozısııa» atty úsh nomınasııada úzdik jumystardy tańdaý jáne marapattaý;
- 13.00-den 15.00-ge deıin «Saryarqa» halyq mýzykasy ansambliniń jáne Úrlemeli orkestrdiń «Mýzykalyq aspaptar álemine saıahat» atty jas mýzykanttarǵa arnalǵan sheberlik saǵattary ótedi, onda balalar mýzykanyń qyr-syryn bilip qana qoımaı, mýzykalyq aspaptardyń qurylysymen tanysady.
- fılarmonııa ujymdarynyń qatysýymen Esil ózeniniń jaǵasynda jáne elordalyq Arbat boıynda fılarmonııa sherýi ótedi. Aýqymdy mýzykalyq sherýge «Saryarqa» halyq mýzykasy ansambli, «Qorqyt» dástúrli saz toby, «Shalqyma» halyq bı ansambli, «Alem» zamanaýı bı baleti, Kameralyq hor, Úrlemeli orkestr, Estradalyq vokal bóliminiń ártisteri qatysady. Sherý 18.30-da Esil jaǵalaýynda bastalyp, 19.30-da fılarmonııa alańynda aıaqtalady.
- 18.30-dan 19.30-ǵa deıin Qazaq orkestri men Halyq áni bóliminiń dástúrli ánshileri ákimdik aldyndaǵy amfıteatrda óner kórsetýi;
- 18.30-dan 19.00-ǵa deıin Ǵazıza Jubanova atyndaǵy Memlekettik ishekti aspaptar kvartetiniń ortalyq kireberistegi konserttik alańda óner kórsetýi;
- 19.30-da fılarmonııa alańynda fılarmonııanyń barlyq ujymdarynyń qatysýymen elordanyń 25 jyldyǵyna arnalǵan 25 sanyn fleshmobpen uıymdastyrý;
- «Fılarmonııa – elordanyń mýzykalyq magnıti» esse baıqaýynyń qorytyndysyn shyǵarý;
- 19.30-dan 21.30-ǵa deıin Sımfonııalyq orkestr jáne barlyq ujymdardyń qatysýymen fılarmonııanyń Gala-konserti josparlanyp otyr.
