Jańa bilim ordasy Memleket basshysy Qasym-Jomart Toqaevtyń respýblıkada sheteldik jetekshi joǵary oqý oryndarynyń fılıaldaryn ashý jáne ónerkásip ınjenerleriniń jańa býynyn qalyptastyrý jónindegi tapsyrmasyn oryndaý maqsatynda quryldy. Ol Sh.Esenov atyndaǵy Kaspıı memlekettik tehnologııalar jáne ınjınırıng ýnıversıtetiniń bazasynda júzege asady.
Qazirgi tańda Mańǵystaý oblysynda energetıka salasynda birqatar iri jobalar iske asyrylyp keledi, sonyń biri – «jasyl» sýtegin óndiretin zaýyt. Osyǵan oraı, jańa Qazaq-Nemis ınstıtýty ınjenerııa salasyndaǵy ozyq tájirıbe negizinde jergilikti jastar men elimizdiń ózge óńirleriniń turǵyndary arasynan suranysqa ıe tehnıkalyq mamandardy daıyndaıtyn bolady.
Bakalavrıattyń alǵashqy stýdentterin oqytý osy jyldyń qyrkúıek aıynda bastalady. 2029 jyly ýaqyt kapsýlasyn ashý mártebesi solardyń enshisine buıyrady, onda Álıhan Smaıylov pen Frank-Valter Shtaınmaıerdiń jańa ýnıversıtettiń alǵashqy túlekterine arnap úndeý haty ornalastyryldy.
2023-2024 jyldary daıyndyq eki bakalavrıat baǵdarlamasy: Gambýrg tehnıkalyq ýnıversıtetiniń «Energetıka jáne ekologııa ınjenerııasy» jáne Vıldaý tehnıkalyq ýnıversıtetiniń «Logıstıkasy» boıynsha júzege asyrylady. Keshendi oqý baǵdarlamasy Sh. Esenov atyndaǵy ýnıversıtette úsh jyl jáne Germanııadaǵy seriktes ýnıversıtette bir jarym jyl oqý merzimin qamtıdy. Osyǵan baılanysty jańa JOO-da nemis tilin úırenýge kóp kóńil bólinetin bolady.
Bilim berý baǵdarlamasy bolashaqta ónerkásipti avtomattandyrý jáne robototehnıka, sý resýrstary men qaldyqtardy basqarý, jańartylatyn energııa kózderin ázirleý, tehnologııalyq ınjınırıng, zattar ınterneti, derekter ǵylymy jáne jasandy ıntellekt sııaqty salalardaǵy 8 bakalavrıat jáne 6 magıstratýra baǵdarlamalaryna deıin keńeıtiledi. Injenerlik mamandyqtar boıynsha qazaqstandyq stýdentter Germanııanyń jetekshi joǵary oqý oryndarynda, sonyń ishinde Vıldaý tehnıkalyq ýnıversıtetinde, Gambýrg tehnıkalyq ýnıversıtetinde, Anhalt qoldanbaly ǵylymdar ýnıversıtetinde, Berlın tehnıkalyq ýnıversıtetinde, Darmshtadt tehnıkalyq ýnıversıtetinde jáne t. b. bilim alady.
Germanııanyń Federaldy Prezıdenti Frank-Valter Shtaınmaıer óz sózinde joǵary bilikti ınjenerlerdi daıarlaý qazaqstandyq jáne nemis kompanııalary úshin de tıimdi ekenin atap ótti.
«Búginde eki elde de bilikti mamandarǵa suranys joǵary. Men osy ınstıtýt pen onyń túlekteriniń bolashaǵy jarqyn bolatynyna senimdimin. Bul – bilim salasyndaǵy óte mańyzdy joba. Eki el arasyndaǵy osy saladaǵy jáne ǵylymı zertteýler salasyndaǵy yntymaqtastyq odan ári damı bermek. Osy jyldyń qyrkúıek aıynda oqýdyń sátti bastalýyna tilektespin», dedi Frank-Valter Shtaınmaıer.
О́z sózinde QR Premer-mınıstri kóp jyldar boıy Qazaqstan men Germanııany ózara tıimdi strategııalyq seriktestik baılanystyryp kele jatqanyn, onyń mańyzdy bóligi, joǵary bilim men ǵylym salasy ekenin atap ótti. Qazirgi ýaqytta eki eldiń ýnıversıtetteri arasynda 178 kelisim jasalyp, onnan astam qos dıplomdyq baǵdarlamalar júzege asyrylýda. Osyǵan baılanysty Qazaq-Nemis turaqty ınjenerııa ınstıtýtyn qurý da óte ózekti bolyp otyr.
«Instıtýt suranysqa ıe kadrlardy daıarlaýǵa, ǵylymı zertteýlerge jáne jańa tehnologııalardy damytýǵa, sonyń ishinde «jasyl» sýtegi óndirisi salasyna óz úlesin qosatyn bolady», dedi Álıhan Smaıylov.
Ol «jasyl» ekonomıkany damytý tabıǵı resýrstardy saqtaýǵa jáne turaqty damýdy qamtamasyz etýge baǵyttalǵan álemdegi negizgi trendterdiń biri ekenin aıtty. Atap aıtqanda, sarapshylardyń pikirinshe, aldaǵy jyldary sýtegige álemdik suranys metall óńdeý, hımııa óndirisi jáne kólik tasymaly sııaqty kóptegen salalarda aıtarlyqtaı artady.
«Biz álemdik úrdisterden qalyspaı, «taza» tehnologııalardy engizýge umtylamyz. Mańǵystaý oblysyndaǵy «jasyl» ekonomıka óńirdiń munaı-gaz salasyna táýeldiligin azaıtyp, jańa jumys oryndarynyń ashylýyna jáne halyqtyń ómir súrý sapasyn arttyrýǵa múmkindik beredi. Instıtýt buǵan óz úlesin qosyp, elimizdiń batysyndaǵy ǵana emes, búkil Ortalyq Azııadaǵy jetekshi bilim ordalarynyń birine aınalady dep senemin», dep atap ótti Álıhan Smaıylov.
Is-sharaǵa QR Ǵylym jáne joǵary bilim mınıstri Saıasat Nurbek, Mańǵystaý oblysynyń ákimi Nurlan Noǵaev, Qazaqstan-Nemis ýnıversıtetiniń prezıdenti Volrad Rommel, Esenov atyndaǵy ýnıversıtettiń prezıdenti Berik Ahmetov qatysty.
