Atyraý oblysynyń ákimi Serik Shápkenovtiń málimetine súıensek, Kaspıı teńizinen, Jaıyq jáne Qıǵash ózenderinen 14 323 tonna balyq aýlanǵan. Onyń 13,2 myń tonnasy óńdelip, 12,7 myń tonna ónim Ázerbaıjan, Izraıl, Reseı Federasııasyna, ózge de shet memleketterge eksporttalǵan.
– Jyl saıyn Jaıyq ózenine bekire tuqymdas balyqtar qoryn saqtaý jáne ósimin molaıtý maqsatynda ósirilgen 8 mln shabaq jiberiledi. Jaıyq jáne Qıǵash ózenine 2017-2021 jyldary aralyǵynda 169 shaqyrym túp tereńdetý jumystary júrgizildi. Endi 2022-2026 jyldary atalǵan sý aıdyndarynyń 295 shaqyrym túbi qazylady. Brakonerlikke qarsy kúresti kúsheıtý úshin Jaıyq-Kaspıı oblysaralyq balyq sharýashylyǵy ınspeksııasyna 2019-2021 jyldary jyldam júretin 10 «Corvet 600» kateri, 10 «Mercury 200» markaly aspaly motory, 1 bran-vahta, 9 avtokólik satyp alyndy, – deıdi S.Shápkenov.
Ákimniń deregine qaraǵanda, taýarly balyq ósirý isi qarqyn alǵaly otyr. Osy oraıda 2025 jylǵa deıin 16,3 mlrd teńgeni quraıtyn 9 ınvestısııalyq jobany júzege asyrý josparlanǵan. Onyń ishinde balyq ósirýdi qolǵa alatyn 8 kásiporyn ashylady. Balyq óńdeıtin bir seh iske qosylady. Bul jobalardyń nátıjesinde taýarly balyq ósirý kólemi 7 myń tonnaǵa, tereń óńdeý kórsetkishi 4 esege artady. Bul jobalardyń arqasynda 511 adam turaqty jumysqa ornalasady.
Reseı Federasııasymen shekaradaǵy Qurmanǵazy aýdanynyń Birlik, Kýdrıashov, Teńiz jáne ózge aýyldarynda balyq óńdeıtin 9 seh jumys istep tur. Al «Kaspıı-Balyq» óndiristik kooperatıvi Birlik aýylynda taǵy bir sehtyń qurylysyn júrgizip jatyr. Jańa sehtyń qabyrǵasy sendvıch-panelden, keramzıt tastan, tóbe shatyry metalloprofılden, metalokarkas materıaldarynan qurastyrylady. Qazir qurylys jumystaryna 30 adam tartylǵan.
– Balyq óndeý sehynyń jobasyna 500 mln teńge ınvestısııa salynyp otyr. Onyń qýaty – jylyna 1 500 tonna balyq óńdeý. Táýligine 30 tonna balyq óńdeletin jańa seh 4 muzdatqysh, salqyndatqysh qurylǵysymen qamtylady. О́ńdeý tehnologııasynyń jumysy suryptaý, aralaý, jýý, tazartý, salqyndatý, muzdatý, tuzdaý sekildi kópsatyly úderiske negizdelgen. Sehta 104 adam turaqty, 50 adam ýaqytsha jumys isteıdi. Bul kooperatıv bıylǵy naýryzda Reseı Federasııasyna 39 tonna balyq ónimin eksporttaǵan. Balyq ónimderi Ýkraına men Grýzııaǵa da jiberiledi, – deıdi aýdandyq aýyl sharýashylyǵy jáne jer qatynastary bóliminiń basshysy Asqar Muftah.
Atyraý qalalyq kásipkerlik jáne aýyl sharýashylyǵy bólimi basshysynyń mindetin atkarýshy Azamat Álibaevtyń aıtýynsha, «Amangeldi atyndaǵy» seriktestiginde 1 500 adam jumyspen qamtylyp otyr. Onyń ishinde 1 100 adam Kaspıı teńizinen, Jaıyq pen Qıǵash ózeninen balyq aýlaıdy. О́zgeleri arnaıy zaýyt pen eki sehtaǵy balyq óńdeý isine tartylǵan. Seriktestikte 20 shaǵyn keme men 6 teplohod bar.
– Byltyr seriktestikte 2 512 tonna balyq ónimi shyǵarylyp, 730 tonnasyn Ázerbaıjan, Ýkraına, Germanııa, Polsha, Rýmynııa, Fransııa, Latvııa, Grýzııa, Izraıl jáne Reseıge eksporttaldy. Al 1 782 tonna balyq ónimi el tutynýshylaryna satyldy. Seriktestik balyqshylary bıylǵy bes aıda 330 tonnaǵa jýyq balyq ónimin daıyndap úlgerdi. Daıyn ónimniń 241 tonnasy eksportqa, al 89 tonnasy ishki naryqqa jiberildi. О́tken jylǵy shildeden beri 4 501 tonna balyq aýlandy. Odan 2,5 myń tonna salqyndatylǵan balyq, 300 tonna balyq eti, 350 tonna ystalǵan, 200 tonna qaqtalǵan balyq ónimderi shyǵaryldy. Balyq ónimderi Atyraý qalasyndaǵy 28 saýda núktesinde satylady, – deıdi A.Álibaev.
Atyraý oblysy
