Iá, jýyrda Túrkistanda ótken «Altyn saqa» halyqaralyq anımasııalyq fılmder festıvalinde túrkitildes memleketterdiń balalarǵa arnalǵan baǵdarlamalar jasaıtyn rejısserleri bas qosqan. Qazaq ulttyq anımasııasyn halyqaralyq deńgeıge kóterý, qazaq folklorynyń keıipkerlerin nasıhattaý maqsatynda uıymdastyrylǵan festıvalge otandyq rejısserlermen qatar, Túrkııa, Ázerbaıjan, О́zbekstan, Túrikmenstan, Qyrǵyzstan, Tatarstan, Bashqurtstannyń anımatorlary qatysty. Uıymdastyrý alqasy men Qazaqstan anımatorlar odaǵy mamandarynan quralǵan Saraptama keńesi atalǵan is-sharada baq synaýǵa ynta bildirgen 70-ke jýyq fılmniń ishinen 30-yn iriktep alyp, olarǵa festıvalge qatysýǵa joldama bergen-di.
Halyqaralyq dárejedegi anımasııa salasynyń mamandarynan quralǵan, Qazaqstan anımatorlar odaǵynyń basshysy, rejısser Batyrhan Dáýrenbekov tóraǵalyq etken qazylar alqasynyń sheshimimen «Aıbyndy aýla» anımasııalyq fılmimen rejısser Azamat Ernazarov Gran prıdi jeńip aldy. Al júldeli I oryndy «Baqashabaq» anımasııalyq fılmimen rejısser Qýanysh Naǵyz ben «Kapıtan Pengý» anımasııalyq fılmimen túrik rejısseri Alı Qarajam ıelendi. Júldeli II oryn «Kenje Batyr» anımasııalyq fılmimen О́zbekstan elinen rejısser Javlon Týrdıhodjaev pen «Qajymuqan» anımasııalyq fılmimen rejısser Amanǵalı Ermanǵa, júldeli III oryn «Tarıhqa oralý» anımasııalyq fılmimen Ázerbaıjan elinen rejısser Jeıhýn Týrksoı men «Marǵaý men Maqta qyz» anımasııalyq fılmimen rejısser Arnur Turlyqojaǵa buıyrdy. Budan bólek qatysýshylar «Úzdik rejısser», «Úzdik qoıýshy sýretshi», «Úzdik ssenarıı» atalymdary boıynsha marapattaldy. Sonymen qatar barlyq qatysýshyǵa «SAQ» kınostýdııasynyń dırektory, festıval uıymdastyrýshysy Nurıddın Patteev Alǵys hat tabys etti.
Oblys ákimdiginiń qoldaýymen, oblystyq mádenıet jáne týrızm basqarmasynyń uıymdastyrýymen ótken festıvaldiń qonaqtary qyzyl kilem ústimen júrip ótti. Sondaı-aq jeńimpazdardyń qurmetine ánnen shashý shashylyp, jalpy is-sharanyń ótý barysynan kúndelik beınefılm kópshilik nazaryna usynyldy.
TÚRKISTAN
