Olar ishki ister organdaryna júrek qalaýlarymen keldi. Jánibek Tólepov 2012 jyly, al Áıgerim Sanabaeva 2015 jyly polısııa qataryna qabyldanǵan. Sodan beri oqaly forma kıip, pogon taqqan jas jubaılar bul salaǵa kelgenderine ókingen emes. Ekeýi de qazir Atyraý oblysynyń Jylyoı aýdandyq polısııa bóliminde eńbek etedi.
– Men osy qyzmetke alǵash kelgen kezde ózimniń bolashaq jubaıymdy keziktirdim. Keıin otbasyn qurdyq. Ol kezde men Jylyoı aýdandyq polısııa bóliminiń kámeletke tolmaǵandardyń ýchaskelik polısııa ınspektory edim. Al Jánibek ýchaskelik polısııa ınspektory bolatyn, – deıdi Áıgerim Sanabaeva.
Búginde erli-zaıyptylardyń ekeýi de polısııa kapıtany. О́z qyzmetterine berilgen olar qajyrly eńbekterimen kózge túsip júr. Bul salada óz basyn qaterge tigip, adam ómirine arasha bolýda erliktiń has úlgisin kórsetken jandar az emes. Solardyń biri – bizdiń keıipkerimiz Jánibek Tólepov. Ishki ister organdary qyzmetkerleri jumys babynda nebir shytyrman oqıǵalardy bastan keshiretini belgili. О́ıtkeni tártip saqshylary únemi qylmys, quqyq buzýshylyq, tótenshe jaǵdaılardyń basy-qasynda júredi. Keıipkerimiz sondaı oqıǵalardyń birimen bólisti.
– 2021 jyly 11 sáýir kúni tańǵy saǵat 04.17 shamasynda Jylyoı aýdandyq polısııa bólimine Qulsary qalasynyń kópqabatty úıleriniń birinde órt shyqqandyǵy týraly habar tústi. Tótenshe jaǵdaılar qyzmetkerlerine habar berilgenine qaramastan, olardyń kelýin kútpeı janymdaǵy áriptesterim, «Qaısar» túngi tosqaýyl tobynyń qyzmetkeri, polısııa aǵa leıtenanty Almat Shahaev, patrýldik polısııa vzvodynyń ınspektorlary, polısııa aǵa leıtenanty Marat Ansat jáne polısııa kishi leıtenaty Aqjol Toıǵulovpen birge órt shyqqan úıdiń turǵyndaryna kómektesýge kiristik.
Oqıǵa ornyna jetkenimizde, tilsiz jaý kúsh alyp, úıdiń ishin qoıý tútin basqan. Tútin arasynan jol taýyp, kópqabatty úı ishin tekserip, kórshiles páterlerden tórt jáne alty jas aralyǵyndaǵy balalar men eresek adamdardy syrtqa shyǵaryp, jedel járdem qyzmetkerlerine tapsyrdyq. Ishtegi jandardyń bári de syrtqa shyǵarylǵanyna kózimiz jetkenshe úıge kirip, tútinge oranǵan bólmelerdi qaıta-qaıta tekserdik. Qandaı jaǵdaı bolsyn birinshi kezekte halyqqa kómektesý – mindetimiz. Bul áreketimizdi erlik nemese batyrlyq dep sanamaımyz. Bastysy, jedel áreket etip, sheshim qabyldaǵanymyzdyń arqasynda adamdar din aman, – deıdi ýchaskelik polısııa ınspektory.
Sol kúni polıseıler men tótenshe jaǵdaı qyzmetkerleriniń batyl sheshimi arqasynda adam shyǵyny bolǵan joq. Bastaryn qaterge tikken Jylyoı aýdandyq polısııa bóliminiń qyzmetkerleri naǵyz azamattyqtyń úlgisin kórsetken bolatyn. Keıin adam ómirin qutqarýda kórsetken erligi úshin Jánibek Tólepov Ishki Ister mınıstrliginiń «Quqyq tártibin qamtamasyz etýge qosqan úlesi úshin» medalimen marapattaldy.
Halyqpen til tabysý – ýchaskelik polısııa ınspektorlary úshin eń basty talap. Jánibek pen Áıgerim halyqtyń senimi polısııa jumysynyń basty kórsetkishi ekenin aıtady. Búginde qos birdeı polısııa kapıtany – el tynyshtyǵyn qorǵaıtyn saqshy ǵana emes, sonymen qatar otbasynyń berekesin saqtap, Jansaıa men Aızere atty eki qyzdy ósirip otyrǵan ata-ana. Qystyń yzǵary men jazdyń aptabyna qaramaı, el múddesi, turǵyndardyń tynysh uıqysy men jarqyn bolashaǵy jolynda tynymsyz qyzmet etip júrgen tártip saqshylarynyń eńbegi qandaı maqtaýǵa da laıyq.
