Sabaq jeltoqsan aıynyń basynda bastalyp, jýrnalıstıka men fılologııa fakýltetine túskisi kelgender birge oqydyq. Oqıtyn jerimiz – 28 Panfılovshylar saıabaǵy mańyndaǵy zań fakýltetiniń ǵımaraty. Sonymen 8-9 aı tyńdaýshylar sanatynan tabylyp, 1975 jyldyń jaıdary jazynda áıgili ýnıversıtet tabaldyryǵyn stýdent retinde abyroımen attadyq. Keıde ózimizshe «Biz KazGÝ-de bes jyl emes, alty jyl oqyǵanbyz» dep qaljyńǵa salyp «keýdemizdi qatty soǵyp» jelpinip sóıleıtinimiz de bar...
Daıyndyq bóliminiń dekany tilshi ǵalym, marqum Talǵat Saırambaev edi. Ol kisi ázildeskendi jaqsy kóretin.Árdaıym áldebir qyzyqty jaıdy áserli áńgimelep, ózi de qarq-qarq kúletin, sóıtip, bárimizdi de máz-meıram etetin.
Sol tusta «Kazgýgrad» qalashyǵynyń qurylysy qarqyndy júrgizilip jatqan-dy. Sol jetpis tórttiń jeltoqsan aıynyń aıaǵynda ondaǵy alǵashqy stýdentter jataqhanasy paıdalanýǵa berilip, Almatynyń ár túkpirin panalap júrgen daıyndyq bóliminiń tyńdaýshylary soǵan «kóshirildi». «Qalashyqtaǵy birinshi bitken jataqhanaǵa biz baryp ornalasqanbyz», dep te maqtanyp qoıamyz kýrstastar bas qosqanda.
Daıyndyq bóliminde bizge ataqty professor, ǵylym doktory Qaıyrjan Bekhojın, belgili tilshi-ǵalym Myrzataı Serǵalıev, ejelgi ádebıet professory Alma Qyraýbaeva syndy myqtylar sabaq berip, dáris oqydy.
Myna 1975 jyly túsirilgen sýrette jýrnalıstıka jáne fılologııa fakýltetine túsýge talapker bir top tyńdaýshy beınelengen. Aramyzda eki-úsh zań fakýltetinen kelgender de bar. Ortada otyrǵandar Alma Qyraýbaeva (ońnan solǵa qaraı), Qaıyrjan Bekhojın jáne jýrfaktyń oqytýshysy Qoıanbek Ahmetov.
Sýrettegilerdiń ishinde keıinnen belgili qazaq aqyny atanǵan marqum dosymyz – Amanhan Álim, sondaı-aq «Egemen Qazaqstanda» eńbek etken úsh birdeı kýrstasymyz – Saıasat Beıisbaı, О́mir Esqalı, Satybaldy Sáýirbaı da tur.
Berikbaı QADYQOV,
Qazaqstannyń Qurmetti jýrnalısi,
Qarasaı aýdanynyń Qurmetti azamaty
Almaty oblysy
